51 వేల మందికి నియామక పత్రాలు అందజేత

xPress24, Hyderabad, September 20, దేశవ్యాప్తంగా నిరుద్యోగ యువతకు ఉపాధి కల్పించే లక్ష్యంతో కేంద్ర ప్రభుత్వం ప్రతిష్టాత్మకంగా చేపట్టిన ‘రోజ్‌గార్ మేళా’ ఇవాళ మరోసారి ప్రారంభమైంది. ఇది 20వ విడత రోజ్‌గార్ మేళా కార్యక్రమం. ఈ సందర్భంగా ప్రధాన మంత్రి నరేంద్ర మోదీ వీడియో కాన్ఫరెన్స్ ద్వారా వివిధ ప్రభుత్వ శాఖల్లో కొత్తగా ఎంపికైన యువతకు నియామక పత్రాలను అందజేశారు. ఈ విడతలో దేశవ్యాప్తంగా వివిధ కేంద్ర ప్రభుత్వ విభాగాల్లో ఉద్యోగాలు సాధించిన 51,000 మందికి పైగా అభ్యర్థులకు అపాయింట్‌మెంట్ లెటర్లు అందించారు. రైల్వే శాఖ, హోం శాఖ, రెవెన్యూ, రక్షణ, వైద్య, కుటుంబ సంక్షేమ శాఖలతో పాటు పలు కీలక శాఖల్లో ఈ నియామకాలు చేపట్టారు. దేశవ్యాప్తంగా మొత్తం 45 ప్రాంతాల్లో ఈ కార్యక్రమం కొనసాగుతోంది. యువతకు ప్రభుత్వ ఉద్యోగాలు కల్పించి, వారిని దేశాభివృద్ధిలో భాగస్వామ్యం చేయడమే ధ్యేయంగా కేంద్ర ప్రభుత్వం రోజ్‌గార్ మేళాను నిర్వహిస్తోంది. ఈ తాజా నియామకాలతో కలిపి ఇప్పటివరకు దేశవ్యాప్తంగా దాదాపు 12.75 లక్షల మందికి పైగా యువతకు ప్రభుత్వ ఉద్యోగాల నియామక పత్రాలు అందించారు. నూతనంగా ఉద్యోగాలు పొందిన యువతీ యువకులకు ప్రధాని మోదీ శుభాకాంక్షలు తెలుపుతూ, దేశ నిర్మాణంలో వారి పాత్ర ఎంతో కీలకమని ఈ వేదికగా గుర్తుచేసుకున్నారు.