అమరవీరుల దినోత్సవం సందర్భంగా కొవ్వొత్తుల ర్యాలీ

xPress24, Adilabad, October 24, అమరవీరుల త్యాగాలను స్మరిస్తూ ఆదిలాబాద్ జిల్లా కేంద్రంలో పోలీసులు ఘనంగా కొవ్వొత్తుల ర్యాలీ నిర్వహించారు. జిల్లా ఎస్పీ అఖిల్ మహాజన్ ఆధ్వర్యంలో జరిగిన ఈ కార్యక్రమంలో.. కలెక్టర్ చౌరస్తా నుండి ప్రారంభమైన క్యాండిల్ ర్యాలీ పట్టణ ప్రధాన వీధుల గుండా అంబేద్కర్ చౌక్ వరకు కొనసాగింది. ఈ ర్యాలీలో ఎస్పీ, అదనపు ఎస్పీలతో పాటు 250 మంది పోలీసు సిబ్బంది, 50 మంది డిఫెన్స్ అకాడమీ విద్యార్థులు ఉత్సాహంగా పాల్గొన్నారు. "అమరవీరులకు జోహార్లు" అంటూ వారు చేసిన నినాదాలతో పట్టణం మార్మోగింది. ఈ సందర్భంగా అమరవీరుల చిత్రపటాలకు పూలమాలలు వేసి ఘన నివాళులర్పించారు. అనంతరం జిల్లా ఎస్పీ అఖిల్ మహాజన్ మాట్లాడుతూ.. నాటి పోలీసుల త్యాగాల ఫలితంగానే నేడు సమాజంలో ప్రశాంత వాతావరణం నెలకొందని స్పష్టం చేశారు. మావోయిస్టులు, టెర్రరిస్టులు, సంఘ విద్రోహ శక్తులతో పోరాడుతూ ప్రాణాలు కోల్పోయిన వీరుల త్యాగాలను గుర్తుచేసుకోవడానికి ఏటా ఈ వారోత్సవాలు నిర్వహిస్తున్నట్లు తెలిపారు. ఈ నెల 30వ తేదీ వరకు పోలీసు సేవల గురించి ప్రజలకు అవగాహన కల్పించేలా వివిధ కార్యక్రమాలు చేపట్టనున్నట్లు ఆయన వెల్లడించారు. ఈ కార్యక్రమంలో ఏఎస్పీలు పి. మౌనిక, బి. సురేందర్ రావు, డీఎస్పీ జీవన్ రెడ్డితో పాటు పలువురు సీఐలు, పోలీసు సిబ్బంది పాల్గొన్నారు.