ఆకస్మిక దాడుల సామర్థ్యాన్ని బలోపేతం చేసుకోవాలి: ఎయిర్ ఫోర్స్ కమాండర్ల సదస్సులో రాజ్‌నాథ్ సింగ్

xPress24, new delhi, November 12, సంప్రదాయ, ఆధునిక భద్రతా సవాళ్లను ఎదుర్కొనేందుకు సాయుధ దళాలు తమ దాడి, రక్షణ సామర్థ్యాలను, నిఘా వ్యవస్థలను, సాంకేతిక సన్నద్ధతను మరింత పటిష్ఠం చేసుకోవాలని రక్షణ శాఖ మంత్రి రాజ్‌నాథ్ సింగ్ పిలుపునిచ్చారు. న్యూఢిల్లీలో గురువారం ప్రారంభమైన రెండు రోజుల ఎయిర్ ఫోర్స్ కమాండర్ల సదస్సులో రాజ్ నాథ్ సింగ్ ప్రసంగించారు. శత్రువుకు ప్రతిస్పందించే సమయం ఇవ్వకుండా దెబ్బతీయడంతో పాటు, శత్రువుల ఆకస్మిక ఎత్తుగడలకు చిక్కకుండా నిఘా వ్యవస్థలను బలోపేతం చేయాలని సూచించారు. ఆధునిక యుద్ధ తంత్రం వేగంగా మారుతోందని, క్షిపణులు, డ్రోన్లు, సైబర్, అంతరిక్ష యుద్ధ రంగాలకు ప్రత్యేక వ్యూహాలు రూపొందించాలని పేర్కొన్నారు. రష్యా-ఉక్రెయిన్, ఇజ్రాయెల్-హమాస్ సంఘర్షణల్లో డ్రోన్లు, గగనతల రక్షణ వ్యవస్థలు కీలక పాత్ర పోషించాయని గుర్తుచేస్తూ, కామికేజ్ డ్రోన్లు, కౌంటర్-డ్రోన్ ఆపరేషన్లకు వాయుసేన సిద్ధంగా ఉండాలని కోరారు. 'ఆపరేషన్ సిందూర్' పనితీరుపై ప్రశంసలు.. ఏఐ యాప్‌ల ఆవిష్కరణ 'ఆపరేషన్ సిందూర్' సమయంలో త్రివిధ దళాల మధ్య సమన్వయాన్ని, భారత వైమానిక దళం ప్రదర్శించిన వృత్తి నైపుణ్యాన్ని రక్షణ మంత్రి అభినందించారు. అగ్నివీరుల కోసం 'సెకండ్ టూర్ ఆఫ్ డ్యూటీ' నిర్ణయం త్రివిధ దళాలను మరింత బలోపేతం చేస్తుందని విశ్వాసం వ్యక్తం చేశారు. ఈ సందర్భంగా వాయుసేనలోని 'ఉడాన్' విభాగం రూపొందించిన పలు కృత్రిమ మేధస్సు (ఏఐ) అప్లికేషన్లను రాజ్‌నాథ్ సింగ్ ప్రారంభించారు. ఆపరేషన్లు, పరిపాలన, ఏరోస్పేస్ భద్రతకు సంబంధించిన పనులను వేగవంతం చేసేందుకు ఈ యాప్‌లను వాయుసేన సురక్షిత నెట్‌వర్క్‌లో ప్రవేశపెట్టారు. 'ది ఇయర్ ఆఫ్ ఎంపవర్‌మెంట్: మాక్సిమైజింగ్ ఎఫిషియన్సీ త్రూ డీసెంట్రలైజేషన్' ఇతివృత్తంతో నిర్వహిస్తున్న ఈ సదస్సులో రక్షణ శాఖ సహాయ మంత్రి సంజయ్ సేథ్, వైమానిక దళాధిపతి ఎయిర్ చీఫ్ మార్షల్ అశుతోష్ దీక్షిత్, రక్షణ కార్యదర్శి రాజేష్ కుమార్ సింగ్, ఉన్నతాధికారులు పాల్గొన్నారు.