ఇజ్రాయెల్ ఎన్నికల్లో విదేశీ జోక్యంపై విచారణకు నెతన్యాహు డిమాండ్

xPress24, Israel, October 29, ఇజ్రాయెల్‌లో ఇటీవల జరిగిన ఎన్నికలకు సంబంధించి అరబ్ పార్టీలపై ప్రధాని బెంజమిన్ నెతన్యాహు తీవ్ర ఆరోపణలు చేశారు. ఎన్నికల్లో విదేశీ శక్తులు జోక్యం చేసుకున్నాయని, అరబ్ పార్టీలకు అనుకూలంగా ఓటర్లకు లంచాలు ఇచ్చారనే ఆరోపణలపై విచారణ జరపాలని సెంట్రల్ ఎలక్షన్స్ కమిటీ (సీఈసీ) చీఫ్ కోరిన విషయాన్ని ఆయన ప్రస్తావించారు. ఈ వ్యవహారంపై పోలీసులు, అత్యున్నత అంతర్గత భద్రతా సంస్థలు తక్షణమే దర్యాప్తు జరపాలని డిమాండ్ చేశారు. జియోనిస్ట్ పార్టీలకు నెతన్యాహు పిలుపు యునైటెడ్ అరబ్ లిస్ట్, జాయింట్ లిస్ట్ కూటములు ఎన్నికల ప్రక్రియను ప్రభావితం చేశాయని నెతన్యాహు 'ఎక్స్' వేదికగా పేర్కొన్నారు. ఇజ్రాయెల్ పార్లమెంటును స్వాధీనం చేసుకోవడం, మితవాద పాలనను అంతం చేయడమే విదేశీ శక్తుల లక్ష్యమని ఆరోపించారు. అటువంటి ప్రభుత్వం ఏర్పడితే దేశ భద్రతకు ముప్పు వాటిల్లుతుందని ఆందోళన వ్యక్తం చేశారు. ప్రభుత్వ ఏర్పాటులో ఏ జియోనిస్ట్ పార్టీ కూడా అరబ్ కూటములతో కలిసి పనిచేయకూడదని పిలుపునిచ్చారు. నెస్సెట్‌లో ముగిసిన కౌంటింగ్ అంచనాలు ఇజ్రాయెల్‌లో ఏ పార్టీకీ స్పష్టమైన మెజారిటీ దక్కే అవకాశం కనిపిచడం లేదు. ప్రాథమిక కౌంటింగ్ అంచనాల ప్రకారం నెతన్యాహు నేతృత్వంలోని లికుడ్ పార్టీ 53 సీట్లు, మాజీ సైన్యాధిపతి గడీ ఐసెన్‌కోట్ సారథ్యంలోని ప్రతిపక్ష పార్టీ 48 సీట్లు గెలుచుకునే అవకాశముంది. అరబ్ పార్టీలకు 19 సీట్లు దక్కుతాయని అంచనా వేస్తున్నారు. 120 సీట్లు ఉన్న పార్లమెంట్ నెస్సెట్‌లో ప్రభుత్వం ఏర్పాటు చేయడానికి 61 సీట్లు అవసరం.