ఉక్రెయిన్ అధ్యక్షుడు జెలెన్‌స్కీతో ప్రధాని మోదీ ఫోన్ సంభాషణ: చర్చలతోనే వివాద పరిష్కారమని స్పష్టీకరణ

xPress24, Delhi, November 10, ప్రధానమంత్రి నరేంద్ర మోదీ.. ఉక్రెయిన్ అధ్యక్షుడు వొలొదిమిర్ జెలెన్‌స్కీతో ఫోన్‌లో మాట్లాడారు. ఈ సంభాషణలో భాగంగా రష్యా-ఉక్రెయిన్ మధ్య కొనసాగుతున్న యుద్ధ పరిణామాలపై తాజా పరిస్థితులను, తన అభిప్రాయాలను జెలెన్‌స్కీ ప్రధానితో పంచుకున్నారు. ఈ సందర్భంగా మానవీయ కోణంలో సమస్యలను పరిష్కరించాలన్న భారత్ విధానాన్ని ప్రధాని మోదీ పునరుద్ఘాటించారు. దౌత్య మార్గాలు, చర్చల ద్వారానే సంక్షోభానికి శాశ్వత పరిష్కారం సాధ్యమవుతుందన్న భారతదేశ స్పష్టమైన వైఖరిని ప్రధాని మరోసారి గుర్తుచేశారు. శాంతి స్థాపనకు ఉద్దేశించిన అన్ని అంతర్జాతీయ ప్రయత్నాలకు సహకరించేందుకు భారత్ సిద్ధంగా ఉందని మోదీ స్పష్టం చేశారు. ద్వైపాక్షిక సంబంధాల బలోపేతంపై చర్చలు ఇరు దేశాల ప్రజల సంక్షేమం, ప్రయోజనాలను దృష్టిలో ఉంచుకుని వివిధ రంగాలలో ద్వైపాక్షిక సహకారాన్ని మరింత పటిష్టం చేసేందుకు అవసరమైన చర్యలపై ఇద్దరు నేతలు చర్చించారు. సంభాషణ అనంతరం  ‘ఎక్స్’ వేదికగా స్పందించిన జెలెన్‌స్కీ, యుద్ధ ముగింపునకు దౌత్యపరమైన సంప్రదింపుల్లో భారత్ కీలక పాత్ర పోషించాలని ఆకాంక్షించారు. నల్లసముద్రం ద్వారా ఆహార ధాన్యాల రవాణాకు ఫుడ్ కారిడార్ల ఏర్పాటులో మధ్యవర్తిత్వం వహించడానికి భారత్ సిద్ధంగా ఉందని ప్రధాని మోదీ తెలిపినట్లు పేర్కొన్నారు.