ఆంధ్రప్రదేశ్
ఏపీఎండీసీని అత్యున్నత స్థాయి మైనింగ్ సంస్థగా తీర్చిదిద్దాలి: సీఎం చంద్రబాబు
20-11-2026 15:42

ఆంధ్రప్రదేశ్ ఖనిజ అభివృద్ధి సంస్థ (ఏపీఎండీసీ)ని అత్యున్నత స్థాయి మైనింగ్ సంస్థగా తీర్చిదిద్దేలా సమగ్ర కార్యాచరణ రూపొందించాలని ముఖ్యమంత్రి చంద్రబాబు నాయుడు అధికారులను ఆదేశించారు.
xPress24, Amaravati, November 20,
అమరావతి: ఆంధ్రప్రదేశ్ ఖనిజ అభివృద్ధి సంస్థ (ఏపీఎండీసీ)ని అత్యున్నత స్థాయి మైనింగ్ సంస్థగా తీర్చిదిద్దేలా సమగ్ర కార్యాచరణ రూపొందించాలని ముఖ్యమంత్రి చంద్రబాబు నాయుడు అధికారులను ఆదేశించారు. శుక్రవారం ఉండవల్లిలోని తన క్యాంపు కార్యాలయంలో మైనింగ్ శాఖపై అధికారులతో ఆయన సమీక్ష నిర్వహించారు.
ఈ సందర్భంగా రాష్ట్రంలో కొత్త ఖనిజ నిక్షేపాల గుర్తింపు, వాటి సమర్థ వినియోగంపై చర్చించారు. ఖనిజ వనరులను కేవలం ఆదాయార్జన సాధనాలుగా మాత్రమే చూడకుండా, భవిష్యత్తు తరాలకు విలువైన ఆస్తులుగా అభివృద్ధి చేయాలని సీఎం సూచించారు.
ఏపీఎండీసీ పరిధిలోని ఖనిజ వనరుల విలువ సుమారు రూ.7.8 లక్షల కోట్లుగా అంచనా వేసినట్లు తెలిపారు. సంస్థను స్టాక్ మార్కెట్లో లిస్ట్ చేసేందుకు వచ్చే ఏడాది డిసెంబర్ను లక్ష్యంగా పెట్టుకుని ఐపీఓ కార్యాచరణ రూపొందించినట్లు వెల్లడించారు. ఏపీఎండీసీ ఈక్విటీ విలువను రూ.86,290 కోట్లుగా అంచనా వేసినట్లు వివరించారు.
ఖనిజ వనరుల అభివృద్ధి, నిర్వహణ కోసం ప్రత్యేకంగా ఆంధ్రప్రదేశ్ రేర్ ఎర్త్ డెవలప్మెంట్ కార్పొరేషన్ (APREDC) ఏర్పాటుకు ముఖ్యమంత్రి ఆమోదం తెలిపారు. లిథియం, కోబాల్ట్, నికెల్, రేర్ ఎర్త్ ఖనిజాల లభ్యతను పెంచుకునేందుకు విదేశాల్లో మైనింగ్ ఆస్తుల కొనుగోలుకు ప్రభుత్వం కార్యాచరణ రూపొందించినట్లు చెప్పారు.
రాష్ట్రంలోని థర్మల్ విద్యుత్ కేంద్రాలకు అవసరమైన బొగ్గును సమకూర్చేందుకు ఒడిశా, జార్ఖండ్ రాష్ట్రాల్లోని మూడు బొగ్గు బ్లాకుల వేలంలో ఏపీఎండీసీ పాల్గొననుందని వెల్లడించారు. ఈ మూడు బ్లాకుల్లో కలిపి 1,774.6 మిలియన్ టన్నుల బొగ్గు నిల్వలు ఉన్నట్లు అంచనా వేశారని తెలిపారు.
అలాగే, రాష్ట్రవ్యాప్తంగా కృత్రిమ మేధ (ఏఐ), మెషిన్ లెర్నింగ్ సాంకేతికత ఆధారంగా 582 ఖనిజ సంభావ్యత ప్రాంతాలను గుర్తించినట్లు సీఎం పేర్కొన్నారు. ఈ ప్రాంతాల్లో ఖనిజ నిక్షేపాల అన్వేషణ, అభివృద్ధికి ప్రాధాన్యం ఇవ్వాలని అధికారులకు సూచించారు.