కేంద్ర ప్రభుత్వ నిర్ణయంతో తగ్గిన క్యాన్సర్ ఔషధాల ధరలు

xPress24, Delhi, November 10, క్యాన్సర్ రోగులకు ఔషధాల విషయంలో  కేంద్ర ప్రభుత్వం భారీ ఉపశమనం కల్పిస్తూ తీసుకున్న నిర్ణయం అమల్లోకి వచ్చింది. మొత్తం  137 రకాల నాన్-షెడ్యూల్డ్ క్యాన్సర్ నివారణ మందులపై ట్రేడ్ మార్జిన్‌ను 30 శాతానికి పరిమితం చేసింది. కేంద్ర రసాయనాలు, ఎరువుల మంత్రిత్వ శాఖ పరిధిలోని నేషనల్ ఫార్మాస్యూటికల్ ప్రైసింగ్ అథారిటీ ఈ మేరకు అధికారిక ఆదేశాలు జారీ చేసింది. ట్రేడ్ మార్జిన్ రేషనలైజేషన్  ద్వారా 137 రకాల క్యాన్సర్ మందుల గరిష్ట విక్రయ ధరలు వాటి ప్రస్తుత ధరల ఆధారంగా 70శాతం వరకు తగ్గాయి. కొన్ని బ్రాండ్లపై ఈ తగ్గింపు మరింత ఉంది. ఈ నిర్ణయం వల్ల వివిధ ఫార్మా కంపెనీలకు చెందిన దాదాపు 543 బ్రాండ్ల క్యాన్సర్ మందుల ధరలు తగ్గాయి. ఇందులో కీమోథెరపీ, టార్గెటెడ్ థెరపీ, ఇమ్యునోథెరపీ వంటి ప్రాణాధార మందులు ఉన్నాయి. క్యాన్సర్ రోగులకు ఔషధాల విషయంలో కేంద్రం తీసుకున్న నిర్ణయం అమలుపై మార్గదర్శకాలు కూడా విడుదలయ్యాయి.  అన్ని రిటైల్ మెడికల్ షాపులు, ప్రైవేట్ ఆసుపత్రులు మారిన కొత్త ధరలను మాత్రమే వసూలు చేయాలి.  ప్రతి ఫార్మసీ తమ వద్ద సవరించిన క్యాన్సర్ మందుల ధరల పట్టికను వినియోగదారులకు కనిపించేలా తప్పనిసరిగా ప్రదర్శించాలి. ఎవరైనా నిబంధనలు ఉల్లంఘిస్తే చర్యలు తీసుకోవాలని రాష్ట్ర డ్రగ్ కంట్రోలర్లను కేంద్ర ప్రభుత్వం ఆదేశించింది.