కరీంనగర్‌లో బీజేపీ మహా పాదయాత్ర.. ఈనెల 18న జాతీయ అధ్యక్షుడు నితిన్ నబీన్ రాక

xPress24, karimnagar, November 10, తెలంగాణలో పార్టీని బలోపేతం చేయడంపై దృష్టి సారించిన బీజేపీ అధిష్టానం కీలక కార్యక్రమాలకు రూపకల్పన చేస్తోంది. ఇందులో భాగంగా బీజేపీ జాతీయ అధ్యక్షుడు నితిన్ నబీన్ పర్యటన ఖరారైంది. ఈనెల 18న ఆయన కరీంనగర్‌కు రానున్నారు. కేంద్ర హోంశాఖ సహాయ మంత్రి బండి సంజయ్ కుమార్ ఆధ్వర్యంలో నగరంలో నిర్వహించనున్న మహా పాదయాత్రలో నితీన్ నబీన్ పాల్గొంటారు. నితిన్ నబీన్ తొలిసారి కరీంనగర్ వస్తున్న నేపథ్యంలో ఈ యాత్రను లక్ష మందితో విజయవంతం చేయాలని బండి సంజయ్ నిర్ణయించారు. కోర్ కమిటీ సమావేశం.. ప్రతిపక్షాలపై బండి సంజయ్ విమర్శలు మహా పాదయాత్ర ఏర్పాట్లపై చర్చించేందుకు ఎంపీ క్యాంప్ కార్యాలయంలో కరీంనగర్ పార్లమెంట్ నియోజకవర్గ కోర్ కమిటీ నేతలతో బండి సంజయ్ సమావేశం నిర్వహించారు. దేశవ్యాప్తంగా గుర్తింపు వచ్చేలా యాత్ర ఏర్పాట్లు ఉండాలని శ్రేణులకు దిశానిర్దేశం చేశారు. కాంగ్రెస్, ఇండీ కూటమి పేరుతో విపక్షాలు లేనిపోని దుష్ప్రచారం చేస్తూ రాజ్యాంగ సంస్థలపై దాడులకు దిగుతున్నాయని ఈ సందర్భంగా బండి సంజయ్ ఆరోపించారు.