కరువు వేళ రైతాంగాన్ని ఆదుకోవాలి: బ్యాంకర్లకు మంత్రి తుమ్మల పిలుపు

xPress24, Hyderabad, November 10, రాష్ట్రంలో నెలకొన్న వర్షాభావ పరిస్థితులను దృష్టిలో ఉంచుకుని రైతాంగాన్ని ఆదుకునేందుకు బ్యాంకర్లు ప్రత్యేక చొరవ చూపాలని వ్యవసాయ శాఖ మంత్రి తుమ్మల నాగేశ్వరరావు విజ్ఞప్తి చేశారు. మంగళవారం నిర్వహించిన రాష్ట్రస్థాయి బ్యాంకర్ల కమిటీ (ఎస్‌ఎల్‌బీసీ) సమావేశంలో మంత్రి తుమ్మల మాట్లాడారు. కరువు ప్రభావిత మండలాల్లో రైతుల పంట రుణాలను రిజర్వ్ బ్యాంక్ ఆఫ్ ఇండియా (ఆర్‌బీఐ) నిబంధనల ప్రకారం వెంటనే రీషెడ్యూలింగ్, రీస్ట్రక్చరింగ్ చేయాలని కోరారు. రైతులు బ్యాంకుల చుట్టూ తిరిగే పనిలేకుండా బ్యాంకర్లే చొరవ తీసుకుని సహాయక చర్యలు చేపట్టాలని స్పష్టం చేశారు. రిజర్వాయర్లలో నీటి నిల్వలు తగ్గడం, భూగర్భ జలాలు పడిపోవడంతో 10 నుంచి 15 లక్షల బోరుబావుల్లో నీరు అందని పరిస్థితి నెలకొందని తెలిపారు. రబీ రుణాల మంజూరు వేగవంతం.. సూక్ష్మ సాగునీరు, అనుబంధ రంగాలకు చేయూత రబీ సీజన్‌కు సంబంధించి నిర్దేశించుకున్న రూ. 38,268 కోట్ల పంట రుణాలను వెంటనే మంజూరు చేయాలని మంత్రి సూచించారు. ఇప్పటివరకు కేటాయించిన రుణ పంపిణీ లక్ష్యాలు పూర్తిస్థాయిలో సాధించకపోవడంపై అసంతృప్తి వ్యక్తం చేస్తూ ప్రక్రియను వేగవంతం చేయాలని ఆదేశించారు. నీటి ఎద్దడిని అధిగమించేందుకు డ్రిప్, స్ప్రింక్లర్ సాగు పరికరాలకు వాణిజ్య బ్యాంకులు విరివిగా రుణాలు అందించాలన్నారు. రాష్ట్రంలో ఆయిల్‌పామ్ సాగు విస్తరణతో పాటు పాడి పరిశ్రమ, పౌల్ట్రీ, పశుపోషణ, ఎఫ్‌పీఓలు, మహిళా స్వయం సహాయక సంఘాలకు వ్యవసాయ ఆధారిత కార్యకలాపాల కోసం సకాలంలో రుణాలు మంజూరు చేసి ఆర్థిక భరోసా కల్పించాలని పిలుపునిచ్చారు. బైట్ తుమ్మల నాగేశ్వరరావు, వ్యవసాయ శాఖ మంత్రి