కృష్ణా బోర్డు కీలక ఆదేశాలు... అనుమతుల వివరాలు కోరుతూ ఏపీ, తెలంగాణకు లేఖలు

xPress24, Hyderabad, November 11, తెలుగు రాష్ట్రాల మధ్య ఉమ్మడి జలాశయాలైన శ్రీశైలం, నాగార్జునసాగర్ ప్రాజెక్టుల నిర్వహణ, అజమాయిషీపై కృష్ణా నదీ యాజమాన్య బోర్డు (KRMB) నిఘా మరింత కఠినతరం చేసింది. ప్రాజెక్టుల పరిధిలోని నిర్మాణాలు, నీటి లెక్కల పర్యవేక్షణను పకడ్బందీగా అమలు చేసే ప్రక్రియలో భాగంగా రెండు రాష్ట్రాలకూ తాజాగా స్పష్టమైన ఆదేశాలు జారీ చేసింది. శ్రీశైలం, నాగార్జునసాగర్ ప్రాజెక్టుల పరిధిలో ఉన్న వివిధ కాంపొనెంట్లు, నిర్మాణాల పూర్తి స్థాయి సమాచారంతో పాటు వాటికి సంబంధించిన చట్టబద్ధమైన అనుమతుల వివరాలను వెంటనే ఇవ్వాలని బోర్డు ఆదేశించింది. ఇరు ప్రాజెక్టుల కింద ఇప్పటివరకు చేపట్టిన అవుట్‌లెట్లు, రెగ్యులేటర్లు, పవర్‌హౌస్‌లు, లింక్ కెనాల్స్ వంటి కీలక విభాగాలపై సమగ్ర నివేదికలు సమర్పించాలని కోరింది. కేవలం నిర్మాణాల వివరాలే కాకుండా, ఆయా కాంపొనెంట్లకు కేంద్ర జల సంఘం,  అపెక్స్ కౌన్సిల్ నుంచి పొందిన అధికారిక అనుమతులు, డీపీఆర్  డాక్యుమెంట్లను కచ్చితంగా జతచేయాలని స్పష్టం చేసింది. తెలుగు రాష్ట్రాల నుంచి ఈ నివేదికలు అందిన వెంటనే, కృష్ణా నదీ యాజమాన్య బోర్డు నిర్వహించే తదుపరి పూర్తిస్థాయి సమావేశంలో వీటిపై లోతుగా సమీక్ష నిర్వహించే అవకాశముంది. ఉమ్మడి ప్రాజెక్టుల నీటి కేటాయింపులు, నిర్వహణ బాధ్యతలపై ఈ నివేదికలు కీలకం కానున్నాయి.