జగిత్యాల జిల్లా న్యాయ సేవాధికార సంస్థ ఆధ్వర్యంలో పోక్సో చట్టంపై అవగాహన కార్యక్రమం...

xPress24, Chalgal, October 31, జగిత్యాల జిల్లా చల్ గల్ ప్రభుత్వ పాఠశాలలో జిల్లా న్యాయ సేవాధికార సంస్థ ఆధ్వర్యంలో పోక్సో చట్టంపై విద్యార్థులకు  అవగాహన కార్యక్రమం నిర్వహించారు. జిల్లా న్యాయ సేవాధికార సంస్థ కార్యదర్శి మట్ట సరిత ముఖ్య అతిథిగా హాజరై పొక్సో పై అవగాహన కల్పించారు. పోలీస్ కళా బృందం వారు పొక్సో చట్టంపై పాటలు పాడుతూ అవగాహన కల్పించారు. 18 సంవత్సరాల లోపు పిల్లల హక్కులను, బాధ్యతలను వివరించారు. కార్యక్రమంలో భాగంగా పోక్సో చట్టంపై రూపొందించిన అవగాహన పోస్టర్‌ను ఆవిష్కరించారు. ఈ సందర్భంగా జిల్లా న్యాయ సేవాధికార సంస్థ కార్యదర్శి మట్ట సరిత మాట్లాడుతూ  జిల్లా న్యాయ సేవాధికార సంస్థ ఆధ్వర్యంలో జిల్లాలో పోక్సో చట్టంపై న్యాయ అవగాహన కార్యక్రమాన్ని నిర్వహిస్తున్నామని తెలిపారు. 18 సంవత్సరాల లోపు పిల్లలందరూ పోక్సో చట్టంపై  అవగాహన కలిగి ఉండాలని తెలిపారు.  పిల్లలు గంజాయి, మత్తు పదార్థాలకు దూరంగా ఉండాలని సూచించారు. గంజాయి తాగిన వారిపై కేసులు నమోదు చేయడం జరుగుతుందని ఒక్కసారి కేసు నమోదు అయితే పై చదువులకు వెళ్లే అవకాశం గాని, ఉద్యోగులు పొందే అవకాశం ఉండదని అందుకని గంజాయి మరియు మత్తు పదార్థాలకు దూరంగా ఉండాలని కోరారు. పిల్లలకు ఏదైనా సమస్యలు ఉంటే నేరుగా జిల్లా న్యాయ సేవాధికార సంస్థ ను సంప్రదించవచ్చునని అన్నారు. 18 సంవత్సరాల లోపు బాల బాలికలపై  లైంగిక వేధింపులు, లైంగిక దాడులు, అశ్లీల కార్యకలాపాల పాల్పడితే కఠిన శిక్షలు ఉంటాయన్నారు. విద్యార్థినులకు తమ శరీరంపై తమకే హక్కు ఉందని, ఎవరైనా అనుచితంగా తాకడం, అసభ్యంగా ప్రవర్తించడం, లైంగిక ఉద్దేశంతో బెదిరించడం లేదా ఆన్‌లైన్‌లో అసభ్యకరమైన సందేశాలు పంపడం వంటి చర్యలను నిర్లక్ష్యం చేయకూడదని వివరించారు. ఇలాంటి పరిస్థితులు ఎదురైనప్పుడు భయపడకుండా తల్లిదండ్రులు, ఉపాధ్యాయులు లేదా సంబంధిత అధికారులకు తెలియజేయాలని సూచించారు. పిల్లలకు ఏవైనా సమస్యలు వున్నా, బాల్య వివాహాలు జరిగిన  1098 కాల్ చేయాలని, వివరాలు గోప్యంగా ఉంటాయని చెప్పారు. ఈ కార్యక్రమంలో జిల్లా బాలల సంరక్షణ అధికారి సురేష్, పాఠశాల ప్రిన్సిపాల్, ఉపాధ్యాయులు పాల్గొన్నారు. బైట్స్: 1. మట్ట సరిత, జిల్లా న్యాయ సేవాధికార సంస్థ కార్యదర్శి 2.  సురేష్, జిల్లా బాలల సంరక్షణ అధికారి