జాతీయ సమైక్యతకు ఏక్ భారత్ శ్రేష్ఠ భారత్: గవర్నర్

xPress24, Hyderabad, October 29, దేశంలోని విభిన్న సంస్కృతులు, సంప్రదాయాలు, కళలు, జీవన విధానాలను పరస్పరం అర్థం చేసుకోవడమే 'ఏక్ భారత్ శ్రేష్ఠ భారత్' కార్యక్రమం ప్రధాన ఉద్దేశమని తెలంగాణ గవర్నర్ శివ ప్రతాప్ శుక్లా తెలిపారు. 'యువ సంగమం ఫేజ్-7' లో భాగంగా అస్సాం రాష్ట్రం నుంచి తెలంగాణకు వచ్చిన 72 మంది సభ్యుల విద్యార్థి బృందంతో రాజ్ భవన్ దర్బార్ హాల్లో ఆయన ముఖాముఖి నిర్వహించారు. విద్యా పర్యటనలతో జ్ఞాన వికాసం ఈ సందర్భంగా గవర్నర్ మాట్లాడుతూ.. విద్యా పర్యటనలను కేవలం వినోదానికే పరిమితం చేయకుండా ప్రాంతాల చరిత్ర, సంస్కృతిపై అవగాహన పెంచుకోవాలని పిలుపునిచ్చారు. కేంద్ర విద్యా మంత్రిత్వ శాఖ, హైదరాబాద్ విశ్వవిద్యాలయం సంయుక్తంగా నిర్వహిస్తున్న ఈ కార్యక్రమం జ్ఞానాన్ని విస్తరించుకోవడానికి లభించిన అవకాశం అని పేర్కొన్నారు. అస్సాం, తెలంగాణ రాష్ట్రాల మధ్య ఉన్న సాంస్కృతిక అనుబంధాన్ని బలోపేతం చేయాల్సిన అవసరం ఉందన్నారు. సాంస్కృతిక వారధులుగా విద్యార్థులు ఈశాన్య రాష్ట్రాల ప్రత్యేకతలను తెలంగాణకు, అలాగే మన రాష్ట్ర విశిష్టతలను ఈశాన్య ప్రాంతాలకు పరిచయం చేసే సాంస్కృతిక వారధులుగా విద్యార్థులు నిలవాలని ఆకాంక్షించారు. ప్రధానమంత్రి నరేంద్ర మోదీ ప్రారంభించిన ఈ కార్యక్రమం జాతీయ సమైక్యతను పటిష్టం చేస్తుందన్నారు. పర్యటనలో భాగంగా చార్మినార్, గోల్కొండ కోటల వైభవం, తెలంగాణ భాష, స్థానిక ఆహార అలవాట్లు, పండుగల ప్రత్యేకతలను తెలుసుకోవాలని సూచించారు.