జలమండలి 37వ ఆవిర్భావ దినోత్సవం సందర్భంగా సిబ్బందికి సీఎం రేవంత్ రెడ్డి శుభాకాంక్షలు

xPress24, Hyderabad, November 1, హైదరాబాద్ మెట్రోపాలిటన్ వాటర్ సప్లై అండ్ సీవరేజ్ బోర్డు (HMWSSB) 37వ ఆవిర్భావ దినోత్సవాన్ని పురస్కరించుకుని ముఖ్యమంత్రి ఎ. రేవంత్ రెడ్డి బోర్డు అధికారులు, ఉద్యోగులు, సిబ్బందితో పాటు వారి కుటుంబ సభ్యులకు హృదయపూర్వక శుభాకాంక్షలు తెలియజేశారు. గత 37 ఏళ్లుగా నగర ప్రజలకు సురక్షితమైన తాగునీటి సరఫరా, సమర్థవంతమైన మురుగునీటి నిర్వహణ సేవలను అందించడంలో జలమండలి పోషిస్తున్న పాత్రను సీఎం కొనియాడారు. నగర అభివృద్ధి, ప్రజారోగ్య పరిరక్షణలో బోర్డు సేవలు ఎంతో కీలకమైనవని ప్రశంసించారు. 'డయల్ గ్రీన్ ట్యాంకర్' ప్రారంభం.. శుద్ధి చేసిన నీటి వినియోగానికి పిలుపు హైదరాబాద్ శరవేగంగా విస్తరిస్తున్న నేపథ్యంలో విలువైన జల వనరుల సంరక్షణకు అత్యధిక ప్రాధాన్యత ఇవ్వాలని ముఖ్యమంత్రి సూచించారు. ప్రస్తుత ఎల్ నినో పరిస్థితులను దృష్టిలో పెట్టుకుని, తాగునీటిని ఇతర అవసరాలకు వాడకుండా పొదుపు పాటించాల్సిన అవసరం ఉందన్నారు. ఈ సందర్భంగా జలమండలి ప్రారంభించిన ‘డయల్ గ్రీన్ ట్యాంకర్ – గ్రీన్ ట్యాంకర్ ఆపరేషన్స్’ విధానాన్ని సీఎం ప్రత్యేకంగా అభినందించారు. ప్రభుత్వ శాఖలు, నిర్మాణ రంగాలు, పరిశ్రమలు, వాణిజ్య సంస్థలు తోటల పెంపకం, నిర్మాణ పనుల కోసం శుద్ధి చేసిన మురుగునీటిని వినియోగించాలని, దీనివల్ల మంచినీటిపై ఒత్తిడి తగ్గి గృహావసరాలకు తగినంత తాగునీరు అందుబాటులో ఉంటుందని పేర్కొన్నారు. నీటి సంరక్షణ సమిష్టి బాధ్యత కావాలి: సీఎం రేవంత్ నీటి సంరక్షణను ప్రజలంతా సమిష్టి బాధ్యతగా స్వీకరించాలని, సుస్థిరమైన, నీటి భద్రత కలిగిన హైదరాబాద్ నగర నిర్మాణంలో ప్రతి ఒక్కరూ భాగస్వాములు కావాలని సీఎం పిలుపునిచ్చారు. కోర్ అర్బన్ రీజియన్ (క్యూర్‌) ప్రజలకు నిరంతరం మెరుగైన సేవలు అందిస్తూ, జలమండలి తన భవిష్యత్ ప్రస్థానంలో మరిన్ని ఉన్నత విజయాలు సాధించాలని ఆకాంక్షించారు.