జవహర్‌నగర్ డంపింగ్ యార్డు తరలింపునకు ఈటల పాదయాత్ర

xPress24, Delhi, October 21, జవహర్‌నగర్ డంపింగ్ యార్డును జనావాసాలకు దూరంగా తరలించాలని డిమాండ్ చేస్తూ ఈ నెల 27 నుంచి పాదయాత్ర చేపట్టనున్నట్లు బీజేపీ ఎంపీ ఈటల రాజేందర్ తెలిపారు. హైదరాబాద్‌లో నిర్వహించిన విలేకరుల సమావేశంలో ఆయన మాట్లాడారు. చెత్త నిర్వహణపై అత్యాధునిక సాంకేతిక పరిజ్ఞానం అందుబాటులో ఉన్నప్పటికీ ప్రభుత్వం దానిని వినియోగించడం లేదని పేర్కొన్నారు. భూగర్భ జలాలు విషతుల్యం జవహర్‌నగర్ డంపింగ్ యార్డును ప్రారంభంలో 2 లక్షల జనాభా అవసరాల కోసం ఏర్పాటు చేశారని ఈటల రాజేందర్ గుర్తుచేశారు. ప్రస్తుతం ఏకంగా 1.60 కోట్ల మందికి సంబంధించిన చెత్తను ఇక్కడికే తరలిస్తున్నారని తెలిపారు. దీనివల్ల చుట్టూ 25 కిలోమీటర్ల రేడియస్‌లో భూగర్భ జలాలు విషతుల్యమయ్యాయని, 30 కిలోమీటర్ల పరిధిలోని ప్రజలు తీవ్ర ఆరోగ్య సమస్యలతో బాధపడుతున్నారని ఆందోళన వ్యక్తం చేశారు. కార్యాచరణ ప్రకటించిన ఈటల డంపింగ్ యార్డు సమస్యపై ఈ నెల 23న జవహర్‌నగర్ బాధితులతో ప్రత్యేక సమావేశం నిర్వహించనున్నట్లు తెలిపారు. అలాగే ఈ నెల 25న మేధావులు, పర్యావరణ వేత్తలతో డంప్ యార్డు ప్రాంతంలోనే రౌండ్ టేబుల్ సమావేశం ఏర్పాటు చేయనున్నట్లు వెల్లడించారు. జనావాసాలను రక్షించే వరకు తమ పోరాటం కొనసాగుతుందని చెప్పారు.