డిండి లిఫ్ట్‌ను రద్దు చేయాలి.. లేదంటే పోరాటం ఉధృతం: డీకే అరుణ

xPress24, Mahabubnager, October 26, డిండి లిఫ్ట్‌ ప్రాజెక్టు అంశంపై మాట్లాడి పాలమూరు రైతులను రెచ్చగొట్టవద్దని శాసనమండలి చైర్మన్‌ గుత్తా సుఖేందర్‌రెడ్డికి మహబూబ్‌నగర్‌ ఎంపీ డీకే అరుణ సూచించారు. డిండి లిఫ్ట్‌ ప్రాజెక్టును తక్షణమే రద్దు చేయాలని డిమాండ్‌ చేశారు. ఈ విషయంలో ప్రభుత్వం స్పందించకపోతే బీజేపీ ఆధ్వర్యంలో పోరాటాన్ని మరింత ఉధృతం చేస్తామని హెచ్చరించారు. రెండు జిల్లాల ప్రజల మధ్య ఘర్షణ వాతావరణం సృష్టించేలా వ్యవహరించవద్దని హితవు పలికారు. మహబూబ్‌నగర్‌లోని తన నివాసంలో నిర్వహించిన మీడియా సమావేశంలో డీకే అరుణ మాట్లాడుతూ.. డిండి లిఫ్ట్‌ ద్వారా 0.6 టీఎంసీల నీటిని తరలించడాన్ని తాము తీవ్రంగా వ్యతిరేకిస్తున్నామని స్పష్టం చేశారు. ఇప్పటికే పాలమూరు–రంగారెడ్డి ఎత్తిపోతల పథకం ద్వారా ఈ ప్రాంత రైతులకు సాగునీరు అందించాల్సిన అవసరం ఉందని పేర్కొన్నారు. పాలమూరు రైతుల ప్రయోజనాలను దృష్టిలో ఉంచుకుని ప్రభుత్వం నిర్ణయాలు తీసుకోవాలని డిమాండ్‌ చేశారు. నల్గొండ జిల్లాకు సాగునీరు అందించేందుకు నక్కలగండి, నాగార్జునసాగర్‌, ఎస్‌ఎల్‌బీసీ వంటి ప్రత్యామ్నాయ మార్గాలు ఉన్నాయని డీకే అరుణ తెలిపారు. అలాంటి అవకాశాలు ఉన్నప్పుడు పాలమూరు ప్రాంత ప్రయోజనాలకు ఇబ్బంది కలిగించే విధంగా డిండి లిఫ్ట్‌ ప్రాజెక్టును ముందుకు తీసుకెళ్లడం సరికాదని అభిప్రాయపడ్డారు. పాలమూరు–రంగారెడ్డి ఎత్తిపోతల పథకాన్ని మొదటి డీపీఆర్‌ ప్రకారం చేపట్టి, ఈ ప్రాంతానికి న్యాయం చేయాలని ప్రభుత్వాన్ని కోరారు. త్వరలో మహబూబ్‌నగర్‌ జిల్లాలోని పెండింగ్‌ ప్రాజెక్టులను స్వయంగా సందర్శించి, వాటి ప్రస్తుత పరిస్థితిని పరిశీలిస్తామని డీకే అరుణ వెల్లడించారు. అనంతరం ప్రాజెక్టుల పూర్తికి సంబంధించి భవిష్యత్‌ కార్యాచరణను ప్రకటిస్తామని తెలిపారు. పాలమూరు రైతుల హక్కులు, సాగునీటి ప్రయోజనాల పరిరక్షణ కోసం బీజేపీ నిరంతరం పోరాటం చేస్తుందని స్పష్టం చేశారు. బైట్‌ 1:  డీకే అరుణ, ఎంపీ బైట్ 2. గోకులం రవి కుమార్ యాదవ్