తుఫాను హెచ్చరిక.. ప్రజలు అప్రమత్తంగా ఉండాలి

xPress24, Nandigama, October 26, నందిగామ, అక్టోబర్ 26: ఎన్‌టీఆర్ జిల్లాలో అక్టోబర్ 27వ తేదీ సాయంత్రం నుంచి అర్నాబ్ తుఫాను ప్రభావంతో భారీ ఈదురుగాలులు, భారీ వర్షాలు కురిసే అవకాశం ఉన్నందున ప్రజలందరూ అప్రమత్తంగా ఉండాలని నందిగామ ఆర్డీవో అనిల్ కుమార్ సూచించారు. సోమవారం నందిగామలో ఆయన మాట్లాడుతూ ప్రజలు తగిన జాగ్రత్తలు తీసుకోవాలని కోరారు. లోతట్టు ప్రాంతాల్లో నివసించే ప్రజలు, పాత భవనాల్లో ఉండేవారు అప్రమత్తంగా ఉండాలని సూచించారు. అత్యవసర పనులు ఉంటే ముందుగానే పూర్తి చేసుకోవాలని, అవసరం లేకుండా బయటకు వెళ్లవద్దని తెలిపారు. తుఫాను పరిస్థితులను ఎదుర్కొనేందుకు జిల్లా కలెక్టర్ ఆదేశాల మేరకు అన్ని ప్రభుత్వ శాఖలను అప్రమత్తం చేసి, అవసరమైన ముందస్తు ఏర్పాట్లు చేపట్టినట్లు వెల్లడించారు. విద్యుత్, రోడ్లు-భవనాలు (ఆర్‌అండ్‌బీ), పంచాయతీరాజ్, రెవెన్యూ, వైద్య ఆరోగ్య శాఖలతో పాటు ఇతర శాఖలు ప్రత్యేక బృందాలను సిద్ధంగా ఉంచాయని తెలిపారు. ఎలాంటి విపత్కర పరిస్థితులు ఎదురైనా తక్షణమే స్పందించేలా చర్యలు చేపట్టినట్లు పేర్కొన్నారు. ప్రజలు ఈ హెచ్చరికను దృష్టిలో ఉంచుకుని అక్టోబర్ 27వ తేదీ సాయంత్రం నుంచి తదుపరి రెండు రోజుల పాటు అప్రమత్తంగా ఉండాలని, అధికారులు జారీ చేసే సూచనలు, హెచ్చరికలను తప్పనిసరిగా పాటించాలని ఆర్డీవో అనిల్ కుమార్ కోరారు.