తెలంగాణలో పెరిగిన చలి తీవ్రత.. 29 జిల్లాలకు ఎల్లో అలర్ట్

xPress24, Hyderabad, November 10, తెలంగాణలో చలి తీవ్రత గణనీయంగా పెరిగింది. రానున్న మూడు రోజుల్లో రాత్రి ఉష్ణోగ్రతలు మరింత పడిపోయే అవకాశాలు ఉన్నాయని భారత వాతావరణ శాఖ వెల్లడించింది. ఈ మేరకు రాష్ట్రంలోని 29 జిల్లాలకు ఎల్లో అలర్ట్ జారీ చేసింది. జోగులాంబ గద్వాల, ఖమ్మం, సూర్యాపేట, జనగామ మినహా మిగిలిన అన్ని జిల్లాల్లో కనిష్ఠ ఉష్ణోగ్రతలు 15 డిగ్రీల సెల్సియస్ కంటే తక్కువగా నమోదయ్యే సూచనలు ఉన్నాయని తెలిపింది. సంగారెడ్డి, మెదక్, కుమురంభీం ఆసిఫాబాద్, మంచిర్యాల, జయశంకర్ భూపాలపల్లి, నిర్మల్, వనపర్తి జిల్లాల్లో ఉష్ణోగ్రతలు 12 డిగ్రీల వరకు పడిపోయే ప్రమాదం ఉందని అధికారులు పేర్కొన్నారు. ఆదిలాబాద్‌లో 14.7 డిగ్రీలు.. పొగమంచుతో వాహనదారులకు హెచ్చరిక రాష్ట్రంలోనే అత్యల్పంగా ఆదిలాబాద్ జిల్లాలో 14.7 డిగ్రీల కనిష్ఠ ఉష్ణోగ్రత నమోదైంది. సిద్దిపేట, కామారెడ్డి, సంగారెడ్డి జిల్లాల్లో 14.8 డిగ్రీలు, హైదరాబాద్‌లో 16.1 డిగ్రీలు రికార్డయ్యాయి. దేశంలోని ఈశాన్య దిశ నుంచి తక్కువ ఎత్తులో వీస్తున్న పొడి శీతల గాలుల ప్రభావంతోనే చలి తీవ్రత పెరుగుతోందని వాతావరణ నిపుణులు తెలిపారు. తెల్లవారుజాము నుంచి ఉదయం వరకు పలు ప్రాంతాల్లో దట్టమైన పొగమంచు కురిసే అవకాశాలు ఉండటంతో రహదారులపై రాకపోకలు సాగించే వాహనదారులు అప్రమత్తంగా ఉండాలని సూచించారు.