తీవ్ర తుపానుగా మారిన 'మురసు': ఏపీలో భారీ వర్షాలు.. విమాన సర్వీసులు రద్దు

xPress24, krisha, November 2, బంగాళాఖాతంలో ఏర్పడిన ‘మురసు’ తుపాను మరింత బలపడి తీవ్ర తుపానుగా మారింది. ఇది గంటకు 25 కిలోమీటర్ల వేగంతో తీరం వైపు దూసుకొస్తుండటంతో ఆంధ్రప్రదేశ్‌లోని పలు జిల్లాల్లో భారీ వర్షాలు కురుస్తున్నాయి. శ్రీపొట్టి శ్రీరాములు నెల్లూరు, కాకినాడ, డాక్టర్ బీఆర్ అంబేడ్కర్ కోనసీమ, కృష్ణా జిల్లాల్లో ఆదివారం రాత్రి నుంచే ఎడతెరిపి లేకుండా వర్షం పడుతోంది. కృష్ణపట్నం పోర్టులో మూడో నంబరు ప్రమాద హెచ్చరిక జారీ చేయగా, తీవ్ర వర్షాల నేపథ్యంలో నెల్లూరు జిల్లాలోని విద్యాసంస్థలకు కలెక్టర్ సెలవు ప్రకటించారు. కాకినాడ నగరంలో లోతట్టు ప్రాంతాలు జలమయమవగా, తుని, అమలాపురం, అంబాజీపేట ప్రాంతాల్లో విస్తారంగా వర్షాలు కురుస్తున్నాయి. ఉత్తరాంధ్రలోనూ వర్షాలు.. రైతుల ఆందోళన శ్రీకాకుళం జిల్లా నరసన్నపేట, జి.సిగడాం, సారవకోటతో పాటు విజయనగరం జిల్లా చీపురుపల్లి, వేపాడ, పార్వతీపురం మన్యం జిల్లా పాలకొండ మండలాల్లో వర్షం కురుస్తోంది. మంత్రి కింజరాపు అచ్చెన్నాయుడు అధికారులను అప్రమత్తం చేస్తూ.. మత్స్యకారులు వేటకు వెళ్లకుండా చూడాలని, విద్యుత్, తాగునీరు, వైద్య సేవలలో అంతరాయం లేకుండా చూడాలని ఆదేశించారు. కాగా, ఇటీవలే వచ్చిన ‘అర్నబ్’ తుపాను వల్ల దెబ్బతిన్న వరి, మినుము, వేరుశనగ, పత్తి, చెరకు, ఉద్యాన పంటల రైతులు.. ఇప్పుడు మురసు తుపాను రూపంలో మరో ముప్పు ముంచుకురావడంతో ఆందోళన చెందుతున్నారు. విశాఖ, విజయవాడల్లో విమానాలు రద్దు.. విద్యుత్ కంట్రోల్ రూమ్‌లు తుపాను ప్రభావం, ప్రతికూల వాతావరణం కారణంగా విశాఖపట్నం, విజయవాడ విమానాశ్రయాల నుంచి నడిచే పలు విమాన సర్వీసులను అధికారులు రద్దు చేశారు. ఇండిగో సంస్థ విజయవాడ నుంచి హైదరాబాద్, విశాఖ, బెంగళూరు, చెన్నై, ముంబయి సహా 12 సర్వీసులను రద్దు చేసింది. ఎయిరిండియా కూడా పలు సర్వీసులను నిలిపివేసింది. మరోవైపు, విద్యుత్ శాఖ (APCPDCL) ప్రజల సౌకర్యార్థం టోల్ ఫ్రీ నంబర్ 1912తో పాటు కృష్ణా (6281709355), ఎన్టీఆర్ (9440817561), గుంటూరు (9440817526), బాపట్ల (9281413774), ప్రకాశం (9440817491), పల్నాడు (7661019447) జిల్లాలకు ప్రత్యేక కంట్రోల్ రూమ్ నంబర్లను ఏర్పాటు చేసింది. తెగిపడిన తీగలు, విద్యుత్ స్తంభాల పట్ల ప్రజలు అప్రమత్తంగా ఉండాలని సూచించింది.