దేశవ్యాప్తంగా ‘డిజిటల్ లైఫ్ సర్టిఫికెట్ క్యాంపెయిన్ 5.0’ ను ప్రారంభించిన కేంద్ర మంత్రి జితేంద్ర సింగ్

xPress24, Delhi, November 6, పింఛనుదారుల జీవన ప్రమాణాలను మరింత సులభతరం చేయడమే లక్ష్యంగా కేంద్ర సిబ్బంది, ప్రజా ఫిర్యాదులు, పెన్షన్ల శాఖ సహాయ మంత్రి డాక్టర్ జితేంద్ర సింగ్ దిల్లీలో దేశవ్యాప్త ‘డిజిటల్ లైఫ్ సర్టిఫికెట్ క్యాంపెయిన్ 5.0’ ప్రచారాన్ని ప్రారంభించారు. ఈ సందర్భంగా జితేంద్ర సింగ్ మాట్లాడుతూ.. సీనియర్ సిటిజన్ల సౌలభ్యం కోసం చేపట్టిన అత్యంత ముఖ్యమైన చర్యల్లో ఈ కార్యక్రమం ఒకటని పేర్కొన్నారు. వికసిత్ భారత్ నిర్మాణంలో సీనియర్ సిటిజన్ల పాత్ర కీలకం: జితేంద్ర సింగ్ ప్రధానమంత్రి నరేంద్ర మోదీ నిర్దేశించిన 'వికసిత్ భారత్' సాధనలో సీనియర్ సిటిజన్లతో సహా ప్రతి పౌరుడి భాగస్వామ్యం ఎంతో కీలకమని కేంద్ర మంత్రి పేర్కొన్నారు. సమాజ నిర్మాణంలో వారు నిరంతరం భాగస్వాములు కావడానికి వారి ఆరోగ్యం, ఆర్థిక భద్రత, సంక్షేమాన్ని నిర్ధారించాల్సిన అవసరం ఉందని స్పష్టం చేశారు. వృద్ధాప్యంలో ఉన్న పెన్షనర్లు తమ వార్షిక జీవిత ధ్రువీకరణ పత్రాలను సమర్పించేందుకు బ్యాంకులు, ప్రభుత్వ కార్యాలయాల చుట్టూ తిరిగే శ్రమను, ఇబ్బందులను తొలగించడమే ఈ డిజిటల్ ప్రచార ప్రధాన ఉద్దేశమని వెల్లడించారు. పెన్షన్ అదాలత్‌ల నిర్వహణ, పాతబడిన నిబంధనల తొలగింపు వంటి సంస్కరణల ద్వారా పింఛను సేవలను ప్రభుత్వం మరింత సరళతరం చేసి పౌరులకు చేరువ చేసిందని డాక్టర్ జితేంద్ర సింగ్ వివరించారు.