నాగులచవితి సందర్భంగా ఆలయాలు, నాగపుట్టల వద్ద భక్తుల సందడి

xPress24, Amalapuram, November 13, అమలాపురం: నాగులచవితి పర్వదినాన్ని పురస్కరించుకుని అంబేద్కర్ కోనసీమ జిల్లావ్యాప్తంగా ఆలయాలు, నాగేంద్ర స్వామి పుట్టల వద్ద భక్తుల సందడి నెలకొంది. తెల్లవారుజాము నుంచే మహిళలు సంప్రదాయ దుస్తులు ధరించి నాగపుట్టల వద్దకు చేరుకున్నారు. పసుపు, కుంకుమ, పూలు, పండ్లతో ప్రత్యేక పూజలు నిర్వహించి నాగదేవతకు పాలు, నైవేద్యాలు సమర్పించారు. భక్తిశ్రద్ధలతో మొక్కులు చెల్లించుకున్నారు. కుటుంబ సభ్యులకు ఆయురారోగ్యాలు, అష్టైశ్వర్యాలు కలగాలని, సంతానం సుఖసంతోషాలతో ఉండాలని నాగేంద్ర స్వామిని ప్రార్థించారు. జిల్లాలోని వేమవరం, అమలాపురం, ముమ్మిడివరం, రాజోలు, కొత్తపేట, రామచంద్రపురం తదితర ప్రాంతాల్లోని సుబ్రహ్మణ్యేశ్వర స్వామి ఆలయాలు భక్తులతో కిటకిటలాడాయి. నాగులచవితి సందర్భంగా ఆలయాల వద్ద భక్తుల రద్దీ నెలకొనడంతో నిర్వాహకులు ప్రత్యేక ఏర్పాట్లు చేశారు. భక్తులు పెద్ద సంఖ్యలో పాల్గొని పూజలు నిర్వహించడంతో జిల్లావ్యాప్తంగా నాగులచవితి వేడుకలు భక్తిశ్రద్ధలతో, ఆనందోత్సాహాల మధ్య జరిగాయి.