తెలంగాణ
నాటు కోళ్ల పెంపకంతో ఆదర్శంగా నిలుస్తున్న ఉన్నత విద్యావంతుడు
17-11-2026 10:29
పెద్దపల్లి జిల్లా రాయదండికి చెందిన ఎం.కాం పట్టభద్రుడు పల్లె రాజు పటేల్ నాటు కోళ్ల పెంపకంతో స్వయం ఉపాధి పొందుతున్నాడు. 20 రాష్ట్రాలకు కోళ్లను విక్రయించడంతో పాటు 3,200 మంది రైతులకు శిక్షణ ఇచ్చి ఆదర్శంగా నిలుస్తున్నాడు.
xPress24, Rayadandi, November 16,
ఉన్నత విద్యను అభ్యసించి ఉద్యోగాల కోసం ఎదురుచూడకుండా, సొంతంగా వ్యాపారాన్ని ప్రారంభించి పలువురికి ఆదర్శంగా నిలుస్తున్నాడు పెద్దపల్లి జిల్లా యువకుడు. అంతర్గాం మండలం రాయదండి గ్రామానికి చెందిన పల్లె రాజు పటేల్ ఉస్మానియా విశ్వవిద్యాలయంలో ఎం.కాం పూర్తి చేశాడు. నగరంలో కల్తీ ఆహారాన్ని గమనించిన ఆయన, ఎలాంటి హార్మోన్లు, ఇంజక్షన్లు వాడకుండా స్వచ్ఛమైన ఆహారం అందించాలనే లక్ష్యంతో 8 సంవత్సరాల క్రితం నాటు కోళ్ల పెంపకాన్ని ప్రారంభించాడు. అగ్రి గ్రీన్ ఫార్మ్స్ పేరిట నాటు కోళ్ల గుడ్లను సేకరించి ఇంక్యుబేటర్, హ్యాచరీలలో 3 రోజుల పాటు ఉంచి పిల్లలను ఉత్పత్తి చేస్తున్నాడు.
20 రాష్ట్రాలకు విస్తరించిన వ్యాపారం, రైతులకు శిక్షణ
ఉత్పత్తి అయిన కోడి పిల్లలను ఇతర ఫామ్లకు విక్రయిస్తూ వ్యాపారాన్ని విస్తరించాడు. ప్రస్తుతం దేశంలోని 20 రాష్ట్రాలకు తాను పెంచిన నాటు కోళ్లను విక్రయిస్తూ, మరికొందరికి ఉపాధి కల్పిస్తున్నాడు. ఇప్పటివరకు 3,200 మంది రైతులకు నాటు కోళ్ల పెంపకంపై శిక్షణ ఇచ్చి వారు ఆర్థికంగా నిలదొక్కుకునేందుకు తోడ్పడ్డాడు. ఆసక్తి ఉన్న రైతులకు తమ ఫామ్ వేదికగా శిక్షణ అందిస్తానని రాజు తెలిపాడు. ఈ రంగంలో చేసిన కృషికి గాను ఇప్పటివరకు 3 జాతీయ స్థాయి బహుమతులు, పలు రాష్ట్రస్థాయి అవార్డులు అందుకున్నాడు.
బైట్ - పల్లె రాజు పటేల్, నాటు కోళ్ల పెంపకందారు, రాయదండి, పెద్దపల్లి జిల్లా