అంతర్జాతీయం
నేడు ఆసియాన్-భారత్, తూర్పు ఆసియా సదస్సుల్లో పాల్గొననున్న ప్రధాని మోదీ
17-11-2026 10:42
ఫిలిప్పీన్స్ రాజధాని మనీలాలో మంగళవారం జరగనున్న 23వ ఆసియాన్-భారత్ సదస్సు, 21వ తూర్పు ఆసియా సదస్సుల్లో ప్రధాని నరేంద్ర మోదీ పాల్గొననున్నారు. వందేళ్ల చరిత్ర కలిగిన 'గురుద్వారా ఖల్సా దివాన్' పునరాభివృద్ధి పనుల ప్రారంభోత్సవంలోనూ ప్రధాని భాగస్వాములు కానున్నారు. అంతకుముందు ఫిలిప్పీన్స్ అధ్యక్షుడు ఇచ్చిన గాలా డిన్నర్కు సంప్రదాయ దుస్తుల్లో హాజరైన మోదీ, 'మహారాడియా లవానా' నాటక ప్రదర్శనను వీక్షించారు.
xPress24, philippines, November 17,
ఫిలిప్పీన్స్ రాజధాని మనీలాలో మంగళవారం జరగనున్న 23వ ఆసియాన్-భారత్ సదస్సు, 21వ తూర్పు ఆసియా సదస్సుల్లో ప్రధానమంత్రి నరేంద్ర మోదీ పాల్గొననున్నారు. 2026 ఏడాదికి ఆసియాన్ ఛైర్మన్ హోదాలో ఫిలిప్పీన్స్ ఈ సదస్సులకు ఆతిథ్యం ఇస్తోంది. ఆసియాన్-భారత్ సదస్సులో భాగంగా 2026-2030 కార్యాచరణ ప్రణాళికతో పాటు ఇరు పక్షాల సమగ్ర వ్యూహాత్మక భాగస్వామ్య పురోగతిని సమీక్షించి, భవిష్యత్ సహకార దిశపై నిర్ణయం తీసుకోనున్నారు. అనంతరం జరిగే తూర్పు ఆసియా సదస్సులో ప్రాంతీయ, అంతర్జాతీయ పరిణామాలపై వివిధ దేశాల అధినేతలతో ప్రధాని అభిప్రాయాలు పంచుకుంటారు. ఈ పర్యటనలో భాగంగా వందేళ్లకు పైగా చరిత్ర కలిగిన మనీలాలోని 'గురుద్వారా ఖల్సా దివాన్' పునరాభివృద్ధి పనుల ప్రారంభోత్సవ కార్యక్రమంలో ప్రధాని మోదీ పాల్గొననున్నారు. ప్రపంచవ్యాప్తంగా సిక్కు సమాజం అందిస్తున్న సేవలు ఎంతో స్ఫూర్తిదాయకమని, ఈ కార్యక్రమంలో పాల్గొనడం తనకు దక్కిన గౌరవమని ప్రధాని మోదీ 'ఎక్స్' వేదికగా పేర్కొన్నారు.
గాలా డిన్నర్లో సంప్రదాయ దుస్తుల్లో మెరిసిన మోదీ.. రామాయణ నాటక వీక్షణ
అంతకుముందు రెండు రోజుల పర్యటన నిమిత్తం సోమవారం మనీలా చేరుకున్న ప్రధాని మోదీకి ప్రవాస భారతీయులు ఘనస్వాగతం పలికారు. అనంతరం పసే సిటీలోని ఫిలిప్పీన్ ఇంటర్నేషనల్ కన్వెన్షన్ సెంటర్లో ఫిలిప్పీన్స్ అధ్యక్షుడు ఫెర్డినాండ్ ఆర్. మార్కోస్ జూనియర్ ఇచ్చిన గాలా డిన్నర్కు ఫిలిప్పీన్స్ సంప్రదాయ దుస్తులైన 'బరోంగ్ తగలోగ్' ధరించి మోదీ హాజరయ్యారు. అధ్యక్షుడు మార్కోస్ జూనియర్, ప్రథమ మహిళ లూయిస్ అరనెటా-మార్కోస్ ప్రధానికి స్వాగతం పలికారు. విందులో భాగంగా రామాయణానికి ఫిలిప్పీన్స్ రూపమైన 'మహారాడియా లవానా' నాటక ప్రదర్శనను మోదీ వీక్షించారు. కమ్యూనిటీ రిసెప్షన్లో చిన్నారుల శ్లోక పఠనం, బాలీవుడ్, భాంగ్రా నృత్యాలు ఇరు దేశాల సాంస్కృతిక బంధాన్ని చాటిచెప్పాయి.