తెలంగాణ
నేడు ఇందిరమ్మ కుటుంబ జీవిత బీమా పథకాన్ని ప్రారంభించనున్న సీఎం రేవంత్
19-11-2026 11:05

సీఎం రేవంత్ రెడ్డి నేడు సిద్ధిపేట జిల్లాలో పర్యటించనున్నారు. ఈ సందర్భంగా రాష్ట్ర ప్రభుత్వం కొత్తగా రూపొందించిన ‘ఇందిరమ్మ కుటుంబ జీవిత బీమా’ పథకాన్ని ప్రారంభించనున్నారు.
xPress24, Hyderabad, November 19,
తెలంగాణ రాష్ట్ర ప్రభుత్వం ప్రతిష్ఠాత్మకంగా రూపొందించిన ‘ఇందిరమ్మ కుటుంబ జీవిత బీమా’ పథకాన్ని ముఖ్యమంత్రి రేవంత్ రెడ్డి ఇవాళ సిద్దిపేట వేదికగా ప్రారంభించనున్నారు. నేడు సిద్దిపేట జిల్లాలో పర్యటించనున్న సీఎం.. ఇందిరమ్మ కుటుంబ జీవిత బీమా పథకాన్నిఅధికారికంగా ప్రారంభిస్తారు. అలాగే రాష్ట్ర ప్రభుత్వ సంక్షేమ పథకాలు ప్రారంభించి.. రూ.544.11 కోట్ల పలు అభివృద్ధి పనులకు శంకుస్థాపన చేయనున్నారు. అలాగే సిద్దిపేటలో యంగ్ ఇండియా ఇంటిగ్రేటెడ్ రెసిడెన్షియల్ స్కూల్, దుబ్బాకలో యంగ్ ఇండియా ఇంటిగ్రేటెడ్ రెసిడెన్షియల్ స్కూల్కు శంకుస్థాపన చేయనున్నారు.
కాగా, అర్హులైన పేద కుటుంబానికి 5 లక్షల జీవితబీమా కల్పించడమే ఈ కొత్త పథకం ప్రధాన ఉద్దేశం. ఇంటింటికి ఇందిరమ్మ బీమా పథకం అమలుకు సంబంధించి ప్రభుత్వం మార్గదర్శకాలను ఇప్పటికే జారీ చేసింది. కుటుంబంలో సంపాదించే వ్యక్తి వయస్సు 18నుంచి 59ఏళ్లలోపు ఉండాలని పేర్కొంది. ఆధార్లోని పుట్టిన తేదీ ఆధారంగా వయస్సును నిర్దారిస్తారు. జనాభా గణనలో గుర్తించిన కుటుంబాల సంఖ్యకు అనుగుణంగా అమలుచేయనున్నారు. కాగా, ఈ పర్యటనలో భాగంగా సిద్దిపేట ఇందిరా చౌరస్తా నుంచి సభ జరిగే నాగదేవత కూడలి వరకు 2.2 కిలోమీటర్ల మేర సీఎం, మంత్రులు, ఎమ్మెల్యేలు, ఎమ్మెల్సీలు పాదయాత్ర చేయనున్నారు.