నిరుద్యోగ యువతకు పీఎం ఇంటర్న్‌షిప్ వరం.. సూర్యాపేటలో పెరిగిన నమోదు

xPress24, SURYAPET, November 2, సూర్యాపేట జిల్లాలోని నిరుద్యోగ యువతీ యువకులకు కేంద్ర ప్రభుత్వం ప్రవేశపెట్టిన ప్రధానమంత్రి ఇంటర్న్‌షిప్ పథకం గొప్ప అవకాశంగా మారిందని సూర్యాపేట జిల్లా పరిశ్రమల శాఖ మేనేజర్ భారతి తెలిపారు. గత ఏడాదితో పోలిస్తే ఈ ఏడాది జిల్లాలో యువత నమోదు శాతం గణనీయంగా పెరిగిందని వెల్లడించారు. జిల్లాలోని ఔత్సాహిక నిరుద్యోగ యువత ఈ సదావకాశాన్ని సద్వినియోగం చేసుకుని తమ ఉపాధి నైపుణ్యాలను మెరుగుపరుచుకోవాలని  పిలుపునిచ్చారు. రూ. 9 వేల ఉపకార వేతనం.. అగ్రశ్రేణి కంపెనీల్లో శిక్షణ ఈ పథకం ద్వారా ఎంపికైన యువతకు దేశంలోని ప్రముఖ కార్పొరేట్ సంస్థలు, అగ్రశ్రేణి కంపెనీలలో ప్రత్యక్ష పని అనుభవం (పెయిడ్ ఇంటర్న్‌షిప్) లభిస్తుందని తెలిపారు. శిక్షణ కాలంలో ప్రతి నెలా రూ. 9,000 చొప్పున ఆర్థిక సహాయంతో పాటు, అదనంగా రూ. 6,000 వన్-టైమ్ గ్రాంట్‌ను కేంద్రం అందజేస్తుంది. అభ్యర్థుల ఆసక్తి, అర్హతను బట్టి 6 నుంచి 9 నెలల పాటు ఈ ఇంటర్న్‌షిప్ చేసే అవకాశం ఉంటుందని, ఏడాది పొడవునా వివిధ రంగాల కంపెనీలలో అవకాశాలు అందుబాటులో ఉంటాయని వివరించారు. వెబ్‌సైట్ ద్వారా ఆన్‌లైన్ దరఖాస్తులు అర్హత, ఆసక్తి గల అభ్యర్థులు అధికారిక పోర్టల్ ద్వారా తమ వివరాలను నమోదు చేసుకోవచ్చని అధికారులు సూచించారు. పథకానికి సంబంధించిన పూర్తి సమాచారం, ఇతర సందేహాల నివృత్తి కోసం టోల్ ఫ్రీ నంబర్ 1800 116 090 ను సంప్రదించవచ్చని తెలిపారు. పోటీ ప్రపంచంలో పరిశ్రమలకు అవసరమైన ప్రత్యక్ష అనుభవాన్ని పొంది బంగారు భవిష్యత్తుకు బాటలు వేసుకోవాలని అధికారులు ఆకాంక్షించారు.