పచ్చిగుడ్ల మయోనైజ్‌పై నిషేధం పొడిగింపు: తెలంగాణ ప్రభుత్వం గెజిట్ నోటిఫికేషన్ విడుదల

xPress24, Hyderabad, November 6, తెలంగాణలో పచ్చిగుడ్లతో తయారుచేసే మయోనైజ్ ఉత్పత్తి, నిల్వ, విక్రయాలపై విధించిన నిషేధాన్ని ప్రభుత్వం మరో ఏడాది పాటు పొడిగించింది. ప్రజారోగ్య పరిరక్షణ దృష్ట్యా ఆహార భద్రతా ప్రమాణాల చట్టం ప్రకారం ఈ నిర్ణయం తీసుకుంటూ రాష్ట్ర ప్రభుత్వం అధికారిక గెజిట్ నోటిఫికేషన్ విడుదల చేసింది. రెస్టారెంట్లు, ఫాస్ట్‌ఫుడ్ సెంటర్లు, వీధి వ్యాపార కేంద్రాల్లో (స్ట్రీట్ ఫుడ్ స్టాళ్లు) పచ్చిగుడ్లతో చేసిన మయోనైజ్‌ను తయారు చేయడం లేదా ఆహార పదార్థాలతో పాటు వడ్డించడం చట్టవిరుద్ధమని గెజిట్‌లో స్పష్టం చేసింది. గత విషాద ఘటన నేపథ్యంలో నిర్ణయం గతంలో హైదరాబాద్ బంజారాహిల్స్ పరిధిలో వీధి వ్యాపారుల వద్ద మోమోస్ తిని ఒక మహిళ మృతి చెందగా, పదుల సంఖ్యలో ప్రజలు అస్వస్థతకు గురై ఆసుపత్రుల పాలయ్యారు. ఆహార భద్రతా అధికారులు నిర్వహించిన ల్యాబ్ పరీక్షల్లో.. మోమోస్‌తో పాటు అందించిన పచ్చిగుడ్ల మయోనైజ్‌లోనే ప్రమాదకర బ్యాక్టీరియా చేరి ఫుడ్ పాయిజనింగ్‌కు కారణమైనట్లు తేలింది. ఈ నేపథ్యంలో ప్రభుత్వం గతేడాది పచ్చిగుడ్ల మయోనైజ్‌పై ఏడాది పాటు నిషేధం విధించింది. తాజాగా ఆ గడువు ముగియడంతో ప్రజారోగ్యాన్ని పరిగణనలోకి తీసుకుని ఆ నిషేధాన్ని మరో ఏడాది పాటు పొడిగిస్తూ తాజా ఉత్తర్వులు జారీ చేసింది.