ప్రజలు విద్యుత్‌ను పొదుపుగా వినియోగించాలి: ఎస్‌ఈ భీమా నాయక్

xPress24, Mahabubnager, October 23, ఎల్‌నినో ప్రభావంతో ఎండల తీవ్రత పెరిగి విద్యుత్ డిమాండ్ అధికమైనప్పటికీ, వినియోగదారుల అవసరాలకు అనుగుణంగా విద్యుత్ సరఫరా చేస్తున్నామని మహబూబ్‌నగర్ విద్యుత్ శాఖ సూపరింటెండింగ్ ఇంజనీర్ (ఎస్‌ఈ) భీమా నాయక్ తెలిపారు. ప్రజలు విద్యుత్‌ను పొదుపుగా వినియోగించాలని సూచించారు. తన కార్యాలయంలో దూరదర్శన్‌తో మాట్లాడుతూ.. అవసరం లేని సమయంలో విద్యుత్ పరికరాలను ఆపివేసి, విద్యుత్ వృథాను అరికట్టాలని కోరారు. ఆరుతడి పంటల సాగుకు ప్రాధాన్యత ఎల్‌నినో ప్రభావంతో వాతావరణ పరిస్థితుల్లో మార్పులు చోటుచేసుకునే అవకాశం ఉన్నందున రైతులు నీటి లభ్యతను దృష్టిలో ఉంచుకుని ఆరుతడి పంటల సాగుకు ప్రాధాన్యత ఇవ్వాలని సూచించారు. వ్యవసాయానికి అంతరాయం లేకుండా విద్యుత్ సరఫరా చేసేందుకు చర్యలు తీసుకుంటున్నామని తెలిపారు. రైతులు పరిస్థితులకు అనుగుణంగా పంటలను ఎంపిక చేసుకోవాలని పేర్కొన్నారు. సోలార్ రూఫ్‌టాప్‌ల ఏర్పాటు విద్యుత్ వినియోగాన్ని తగ్గించుకునేందుకు ప్రజలు తమ ఇళ్లపై సోలార్ రూఫ్‌టాప్ వ్యవస్థలను ఏర్పాటు చేసుకోవాలని భీమా నాయక్ సూచించారు. సౌర విద్యుత్ ద్వారా విద్యుత్ బిల్లులను తగ్గించుకునే అవకాశం ఉందని, ప్రభుత్వ పథకాలపై అవగాహన పెంచుకుని అర్హతను బట్టి సబ్సిడీ ప్రయోజనాలను పొందాలని కోరారు.