ప్రభుత్వ ఆసుపత్రుల్లో నాణ్యమైన వైద్య సేవలు అందించాలి

xPress24, Paravathipuram, October 22, పార్వతీపురం మన్యం జిల్లా, అక్టోబర్ 22: ప్రభుత్వ ఆసుపత్రులకు వచ్చే రోగులకు నాణ్యమైన వైద్య సేవలు అందించాలని జిల్లా సంయుక్త కలెక్టర్, పార్వతీపురం ఐటీడీఏ ప్రాజెక్టు అధికారి ఆర్. వైశాలి వైద్య సిబ్బందిని ఆదేశించారు. ఈ మేరకు గురువారం పార్వతీపురం మన్యం జిల్లా కొమరాడ మండలంలోని కునేరు రామభద్రపురం ప్రాథమిక ఆరోగ్య కేంద్రాన్ని ఆమె ఆకస్మికంగా సందర్శించి తనిఖీ చేశారు. ఈ సందర్భంగా ఆరోగ్య కేంద్రంలోని పారిశుద్ధ్య నిర్వహణ, రోగులకు అందుతున్న వైద్య సేవలు, మందుల నిల్వలు, వైద్య పరికరాల పనితీరు, సిబ్బంది హాజరు, రోగుల రికార్డుల నిర్వహణను పరిశీలించారు. ఆరోగ్య కేంద్రానికి వచ్చే రోగులకు ఎలాంటి అసౌకర్యం కలగకుండా మెరుగైన వైద్య సేవలు అందించాలని, అవసరమైన మందులను ఎల్లప్పుడూ అందుబాటులో ఉంచాలని వైద్యాధికారులు, సిబ్బందికి సూచించారు. పరిసర గ్రామాల ప్రజల ఆరోగ్య పరిరక్షణకు ప్రాధాన్యతనిస్తూ వైద్య సిబ్బంది బాధ్యతాయుతంగా విధులు నిర్వహించాలని ఆదేశించారు.