ప్రభుత్వ విద్యా సంస్థలతోనే ఉన్నత విద్య సాధ్యం: ఎమ్మెల్యే

xPress24, Ramagundam, October 29, ప్రభుత్వ విద్యా సంస్థల్లోనే నాణ్యమైన ఉన్నత విద్య అందుతుందని రామగుండం ఎమ్మెల్యే రాజ్ ఠాగూర్ మక్కాన్ సింగ్ తెలిపారు. పెద్దపల్లి జిల్లా గోదావరిఖనిలో రామగుండం ఎన్టీపీసీ విద్యుత్ పరిశ్రమ రూ.2,12,00,000 వ్యయంతో నిర్మించిన ఎస్సీ బాలికల వసతి గృహాన్ని ఆయన ప్రారంభించారు. అనంతరం హాస్టల్‌లో విద్యార్థినులకు కల్పించిన సదుపాయాలు, వసతులను అధికారులతో కలిసి పరిశీలించారు. కార్పొరేట్‌కు ధీటుగా నాణ్యమైన విద్య ఈ సందర్భంగా ఏర్పాటు చేసిన కార్యక్రమంలో ఎమ్మెల్యే మాట్లాడుతూ.. కాంగ్రెస్ ప్రభుత్వం కార్పొరేట్ విద్యా సంస్థలకు ధీటుగా విలువలతో కూడిన విద్యను అందిస్తోందన్నారు. చదువుతో పాటు అన్ని రంగాల్లో విద్యార్థులు ప్రావీణ్యం సాధించాలని సూచించారు. రామగుండంలో రూ.2,00,00,000తో ఇంటిగ్రేటెడ్ స్కూల్ నిర్మిస్తున్నట్లు వెల్లడించారు. ఎన్టీపీసీ సహకారం ప్రశంసనీయం విద్యాభివృద్ధికి ఎన్టీపీసీ అందిస్తున్న సహకారం అభినందనీయమని ఎమ్మెల్యే పేర్కొన్నారు. విద్యార్థులు ఉన్నత చదువులు చదివి ఈ ప్రాంతానికి మంచి గుర్తింపు తీసుకురావాలని పిలుపునిచ్చారు. కార్యక్రమంలో నగర మేయర్ మహంకాళి స్వామి, ఎన్టీపీసీ ఈడీ ఫయాజ్ తయ్యాబ్, ఇతర అధికారులు పాల్గొన్నారు. బైట్ - రాజ్ ఠాగూర్ మక్కాన్ సింగ్, రామగుండం ఎమ్మెల్యే