పరిశ్రమల్లో ప్రమాదాల నివారణకు భద్రతా చర్యలు పటిష్టం చేయాలి: హరీశ్ రావు

xPress24, Hyderabad, October 23, ప్రభుత్వ నిర్లక్ష్యం అమాయక కార్మికుల ప్రాణాలను బలితీసుకుంటోందని మాజీ మంత్రి హరీశ్ రావు విమర్శించారు. సంగారెడ్డి జిల్లా గడ్డపోతారం పారిశ్రామిక వాడలోని సరాక రసాయన పరిశ్రమలో గ్యాస్ లీక్ అయి ఇద్దరు కార్మికులు మృతి చెందిన ఘటనపై ఆయన స్పందించారు. ఈ ప్రమాదం తీవ్ర విషాదకరమని పేర్కొంటూ మృతుల కుటుంబాలకు ప్రగాఢ సానుభూతి తెలిపారు. క్షతగాత్రులకు మెరుగైన వైద్యం అందించాలని, మృతుల కుటుంబాలకు రూ. 1 కోటి ఎక్స్ గ్రేషియా ప్రకటించాలని ప్రభుత్వాన్ని డిమాండ్ చేశారు. సమగ్ర విచారణకు డిమాండ్ సరాక పరిశ్రమ ప్రమాద ఘటనపై సమగ్ర విచారణ జరిపించాలని హరీశ్ రావు కోరారు. ప్రమాదానికి బాధ్యులైన కంపెనీ యాజమాన్యంపై కఠిన చర్యలు తీసుకోవాలని స్పష్టం చేశారు. భవిష్యత్తులో ఇలాంటి ఘటనలు పునరావృతం కాకుండా పరిశ్రమల్లో భద్రతా చర్యలను పటిష్టం చేయాలని సూచించారు. ఉపాధి కోసం వచ్చిన అమాయక కార్మికుల ప్రాణాలకు ప్రభుత్వం భరోసా కల్పించాలని డిమాండ్ చేశారు.