పర్షియన్ గల్ఫ్‌లో క్రూడ్ నౌకపై క్షిపణి దాడి.. భారతీయుడికి గాయాలు.. క్షేమంగా మిగిలిన సిబ్బంది

xPress24, Delhi, November 11, పర్షియన్ గల్ఫ్‌లో ప్రయాణిస్తున్న చమురు రవాణా నౌకపై క్షిపణి దాడి జరిగినట్లు కేంద్ర నౌకాశ్రయాలు, షిప్పింగ్, జలమార్గాల శాఖ మంత్రి సర్బానంద సోనోవాల్ వెల్లడించారు. లైబీరియా పతాకంతో అల్ రువైస్ నుంచి దుబాయ్‌కి వెళ్తున్న 'ఎంటీ ఫుజైరా ఎనర్జీ' నౌకపై మంగళవారం దాడి జరిగిందని తెలిపారు. ఈ ఘటనలో నలుగురు సిబ్బంది గాయపడగా, వారిలో ఒక భారతీయ నావికుడు ఉన్నారని పేర్కొన్నారు. గాయపడిన భారతీయుడికి స్వల్ప గాయాలయ్యాయని, మెరుగైన వైద్య పరీక్షల కోసం ఆయనను సురక్షితంగా తీరానికి తరలించినట్లు ఎక్స్ వేదికగా స్పష్టం చేశారు. నౌకలోని మిగిలిన ఐదుగురు భారతీయులతో సహా మొత్తం 18 మంది సిబ్బంది క్షేమంగా ఉన్నారని వెల్లడించారు. నావికుల భద్రత, వైద్య సదుపాయాలను పర్యవేక్షించేందుకు షిప్ మేనేజ్‌మెంట్ కంపెనీతో నిరంతరం సంప్రదింపులు జరుపుతున్నట్లు మంత్రి తెలిపారు. పశ్చిమాసియా సంక్షోభంలో 23 మంది భారతీయుల మృతి పశ్చిమాసియాలో కొనసాగుతున్న ఉద్రిక్తతల కారణంగా ఇప్పటివరకు 15 మంది నావికులతో సహా మొత్తం 23 మంది భారతీయులు ప్రాణాలు కోల్పోయారని భారత విదేశీ వ్యవహారాల మంత్రిత్వ శాఖ అధికార ప్రతినిధి రణధీర్ జైస్వాల్ ఢిల్లీలో మీడియాకు తెలిపారు. అలాగే నల్లసముద్రం ప్రాంతంలో వాణిజ్య నౌకలపై జరిగిన దాడుల్లో మరో ఐదుగురు భారత పౌరులు మరణించారని పేర్కొన్నారు. నవంబర్ 2న 14 మంది భారతీయులు ఉన్న నౌకపై దాడి జరిగినప్పుడు 13 మందిని రక్షించిన ఒమన్ ప్రభుత్వ అధికారులకు విదేశాంగ శాఖ కృతజ్ఞతలు తెలిపింది.