తెలంగాణ
పిల్లల మాటకు విలువ ఇద్దాం, అభిప్రాయాలను గౌరవిద్దాం: కలెక్టర్ హేమంత్
17-11-2026 10:28
ములుగు జిల్లా కలెక్టరేట్లో బాలల హక్కుల వారోత్సవాల్లో భాగంగా పిల్లల ప్రజావాణి నిర్వహించారు. జిల్లా కలెక్టర్ బోర్కాడే హేమంత్ సహదేవరావు విద్యార్థులతో నేరుగా మాట్లాడి వారి సమస్యలను తెలుసుకుని దరఖాస్తులను స్వీకరించారు.
xPress24, Mulugu, November 16,
ములుగు జిల్లా సమీకృత కలెక్టరేట్లో బాలల దినోత్సవం, బాలల హక్కుల వారోత్సవాలను పురస్కరించుకుని పిల్లల ప్రజావాణి నిర్వహించారు. తెలంగాణ రాష్ట్ర బాలల హక్కుల పరిరక్షణ కమిషన్ ఆదేశాల మేరకు మహిళా అభివృద్ధి, శిశు సంక్షేమ శాఖ ఆధ్వర్యంలో యూనిసెఫ్ భాగస్వామ్యంతో 'నా రోజు.. నా హక్కులు.. నా భవిష్యత్' నినాదంతో ఈ కార్యక్రమం జరిగింది. వివిధ పాఠశాలల విద్యార్థులను ఆహ్వానించి ప్రజావాణి నిర్వహించే విధానాన్ని ప్రత్యక్షంగా చూపించారు. జిల్లా కలెక్టర్ బోర్కాడే హేమంత్ సహదేవరావు విద్యార్థులతో నేరుగా మాట్లాడి పాఠశాలలు, నివాస ప్రాంతాల్లో ఎదుర్కొంటున్న సమస్యలను అడిగి తెలుసుకుని వినతిపత్రాలు స్వీకరించారు.
దరఖాస్తుల పరిశీలన, తగిన చర్యలు
కలెక్టర్ హేమంత్ మాట్లాడుతూ.. ప్రభుత్వ ఆదేశాల మేరకు ప్రతి సోమవారం జిల్లా, మండల స్థాయిల్లో ప్రజావాణి నిర్వహిస్తున్నామని తెలిపారు. ప్రజలు తమ సమస్యల పరిష్కారానికి ఈ వేదికను వినియోగించుకోవాలని సూచించారు. విద్యార్థులు అందించిన దరఖాస్తులను పరిశీలించి, జిల్లా స్థాయిలో పరిష్కరించగల సమస్యలపై తగిన చర్యలు తీసుకుంటామని వెల్లడించారు. జిల్లా సంక్షేమ అధికారి ప్రేమలత మాట్లాడుతూ.. నవంబర్ 14 నుంచి 20 వరకు నిర్వహిస్తున్న బాలల వారోత్సవాల్లో భాగంగా పాఠశాలలు, జూనియర్ కళాశాలల విద్యార్థులు తమ ఇబ్బందులు, సూచనలను నేరుగా కలెక్టర్కు తెలియజేసే అవకాశం కల్పించామని పేర్కొన్నారు.
బైట్ - హేమంత్ బోర్కాడే సహదేవరావు ఐఏఎస్ (ములుగు జిల్లా కలెక్టర్)
ప్రేమలత (ములుగు జిల్లా సంక్షేమ అధికారి)