పాస్‌పోర్ట్, ఎన్‌ఐడీ కోసం షేక్ హసీనా దరఖాస్తు.. బంగ్లాదేశ్ తిరుగు ప్రయాణానికి సన్నాహాలు

xPress24, Delhi, November 9, బంగ్లాదేశ్ మాజీ ప్రధానమంత్రి షేక్ హసీనా తన స్వదేశానికి తిరిగి వెళ్లేందుకు సన్నాహాలు ముమ్మరం చేశారు. ఇందులో భాగంగా నూతన బంగ్లాదేశ్ పాస్‌పోర్ట్, జాతీయ గుర్తింపు కార్డు (ఎన్‌ఐడీ) జారీ చేయాలని కోరుతూ దిల్లీలోని బంగ్లాదేశ్ హైకమిషన్‌ను ఆశ్రయించారు. ఈ విషయాన్ని ఆమె రాజకీయ పార్టీ అవామీ లీగ్ సోమవారం ప్రకటించింది. గతంలో అధికారంలో ఉన్న ముహమ్మద్ యూనస్ నేతృత్వంలోని మధ్యంతర ప్రభుత్వం షేక్ హసీనా  ప్రస్తుత పత్రాలను రద్దు చేసిన నేపథ్యంలో ఈ తాజా పరిణామం చోటుచేసుకుంది. డిసెంబర్‌లో స్వదేశానికి.. న్యాయ ప్రక్రియను ఎదుర్కొంటానని వెల్లడి లండన్‌కు చెందిన మ్యాట్రిక్స్ ఛాంబర్స్ న్యాయవాదుల ద్వారా హసీనా దరఖాస్తు సమర్పించినట్లు అవామీ లీగ్ తెలిపింది. అంతర్జాతీయ మానవ హక్కుల చట్టాలు, బంగ్లాదేశ్ పౌరసత్వ హక్కుల ప్రకారం దరఖాస్తు ప్రక్రియను వేగవంతం చేయాలని కోరారు. దాదాపు రెండేళ్లకు పైగా భారత్‌లో నివసిస్తున్న హసీనా, రాబోయే డిసెంబర్‌లో బంగ్లాదేశ్‌కు తిరిగి వెళ్లి తనపై నమోదైన న్యాయపరమైన కేసులను ఎదుర్కొనేందుకు సిద్ధంగా ఉన్నట్లు పునరుద్ఘాటించారు. తనపై అరెస్టులు, దాడులు జరిగే ప్రమాదం ఉన్నప్పటికీ దేశ ప్రజల కోసం వెనకడుగు వేయబోనని స్పష్టం చేశారు. తనకు ఆశ్రయం కల్పించిన భారత ప్రభుత్వానికి, ప్రజలకు ఆమె ధన్యవాదాలు తెలిపారు. హసీనాకు పాస్‌పోర్ట్ లేదా ప్రయాణ పత్రాల అవసరం లేదని, ఇరు దేశాల మధ్య ఉన్న నేరస్థుల ప్రత్యర్పణ ఒప్పందం (ఎక్స్‌ట్రాడిషన్ ట్రీటీ) ప్రకారం భారత్ ఆమెను బంగ్లాదేశ్‌కు అప్పగించాలని బంగ్లాదేశ్ విదేశాంగ శాఖ సహాయ మంత్రి హుమాయున్ కబీర్ పేర్కొన్నారు. ఆమె పారిపోయిన నిందితురాలని, న్యాయ విచారణ ఎదుర్కోవాల్సి ఉందని వ్యాఖ్యానించారు.