బాణాసంచా విక్రయాలకు భద్రతా నిబంధనలు తప్పనిసరి: హైదరాబాద్ అగ్నిమాపక శాఖ

xPress24, Hyderabad, November 6, దీపావళి పండుగ సందర్భంగా ప్రమాదాల నివారణకు బాణాసంచా దుకాణదారులు భద్రతా ప్రమాణాలు పాటించాలని హైదరాబాద్ జిల్లా అగ్నిమాపక శాఖ ఆదేశించింది. నిబంధనలు పాటిస్తేనే విక్రయాలకు తాత్కాలిక లైసెన్సులు మంజూరు చేస్తామని అధికారులు స్పష్టం చేశారు. చిన్నపాటి నిర్లక్ష్యం ప్రమాదాలకు దారితీసే అవకాశం ఉన్నందున ఫైర్ సేఫ్టీ మార్గదర్శకాలను అమలు చేయాలని సూచించారు. మైదానాల్లోనే అనుమతి.. దుకాణాల మధ్య 3 మీటర్ల దూరం నిర్దేశిత మైదానాలు, సురక్షిత ప్రాంతాల్లో మాత్రమే బాణాసంచా దుకాణాలకు తాత్కాలిక అనుమతులు ఇస్తున్నట్లు అధికారులు తెలిపారు. రద్దీ నియంత్రణకు ఒక ప్రాంతంలో గరిష్ఠంగా 100 దుకాణాలకు మాత్రమే అనుమతి ఉంటుందన్నారు. ప్రమాదాల తీవ్రతను తగ్గించేందుకు దుకాణాల మధ్య కనీసం 3 మీటర్ల ఖాళీ స్థలాన్ని వదలడం తప్పనిసరి చేశారు. అనుమతికి మించి నిల్వ చేస్తే చర్యలు లైసెన్సులో పేర్కొన్న పరిమాణానికి మించి క్రాకర్స్ నిల్వ చేయకూడదని, అనధికార లేదా నాసిరకం టపాసులను విక్రయించడం నేరమని హెచ్చరించారు. దుకాణాల వద్ద 'నో స్మోకింగ్' బోర్డులను ఏర్పాటు చేయాలని, మంటలను ఆర్పేందుకు 200 లీటర్ల నీటి బ్యారెళ్లు, ఇసుక బకెట్లను సిద్ధంగా ఉంచుకోవాలని ఆదేశించారు. నిబంధనలు ఉల్లంఘిస్తే దుకాణాలను సీజ్ చేసి లైసెన్సులు రద్దు చేస్తామని స్పష్టం చేశారు.