బియ్యం కృత్రిమ కొరత సృష్టిస్తే పీడీ యాక్ట్.. గరిష్ట ధరలు ఖరారు చేసిన తెలంగాణ పౌరసరఫరాల శాఖ

xPress24, Hyderabad, November 10, తెలంగాణలో బియ్యం కృత్రిమ కొరత సృష్టించి ఎక్కువ ధరలకు విక్రయించే వ్యాపారులపై కఠిన చర్యలు తీసుకుంటామని రాష్ట్ర పౌరసరఫరాల శాఖ హెచ్చరించింది. ఎంఆర్‌పీని మించి అమ్మినా, బస్తాలపై నకిలీ స్టిక్కర్లు అతికించి ప్రజలను మోసగించినా సహించేది లేదని స్పష్టం చేసింది. మార్కెట్‌లో బియ్యం కొరత ఉందంటూ వస్తున్న వార్తలు పూర్తిగా వదంతులేనని, ప్రజలు ఎవరూ ఆందోళన చెందవద్దని పేర్కొంది. రిటైల్ వ్యాపారులు హోల్‌సేలర్లపై ఆధారపడకుండా నేరుగా రైస్ మిల్లర్ల నుంచే బియ్యం నిల్వలను తెప్పించుకోవచ్చని సూచించింది. నిబంధనలు ఉల్లంఘించి అక్రమ నిల్వలు, బ్లాక్ మార్కెటింగ్‌కు పాల్పడితే పీడీ యాక్ట్ నమోదు చేస్తామని తేల్చిచెప్పింది. రకాల వారీగా గరిష్ట విక్రయ ధరల నిర్ణయం.. క్షేత్రస్థాయిలో నిఘా వినియోగదారుల ప్రయోజనాలను పరిరక్షించేందుకు వివిధ రకాల బియ్యం గరిష్ట విక్రయ ధరలను పౌరసరఫరాల శాఖ ఖరారు చేసింది. బీపీటీ, కేఎన్ఎం రకాల బియ్యం కిలో గరిష్ట ధరను రూ. 66గా నిర్ణయించారు. ఆర్ఎన్ఆర్, తెలంగాణ సోనా రకాల ధరను కిలోకు రూ.74గా, హెచ్ఎంటీ, జేఎస్ఆర్ రకాల బియ్యం ధరను కిలోకు రూ. 79గా నిర్దేశించారు. ఈ నిర్ణీత ధరల కంటే అధిక మొత్తానికి విక్రయిస్తే చట్టపరమైన చర్యలు తప్పవని అధికారులు స్పష్టం చేశారు. మార్కెట్‌లో మోసాలను అరికట్టేందుకు ప్రత్యేక బృందాలతో క్షేత్రస్థాయి తనిఖీలను ముమ్మరం చేసినట్లు వెల్లడించారు.