భూ రీసర్వే పనులను వేగవంతంగా, పారదర్శకంగా పూర్తి చేయాలి

xPress24, Paravathipuram, October 29, పార్వతీపురం మన్యం జిల్లా, అక్టోబర్ 29: భూ రీసర్వే పనులను వేగవంతం చేసి, పారదర్శకంగా పూర్తి చేయాలని జిల్లా సంయుక్త కలెక్టర్ ఆర్. వైశాలి అధికారులను ఆదేశించారు. గురువారం సాలూరు మండలం మామిడిపల్లి గ్రామ సచివాలయంలో జరుగుతున్న భూ రీసర్వే పనుల పురోగతిని ఆమె క్షేత్రస్థాయిలో పరిశీలించారు. ఈ సందర్భంగా ఇప్పటివరకు పూర్తయిన సర్వే పనులు, భూ రికార్డుల నమోదు ప్రక్రియ, రైతుల నుంచి అందిన అర్జీలు, వాటి పరిష్కారానికి తీసుకుంటున్న చర్యలపై అధికారులను అడిగి వివరాలు తెలుసుకున్నారు. భూ రీసర్వే ప్రక్రియలో ఎలాంటి పొరపాట్లకు తావులేకుండా తగిన జాగ్రత్తలు తీసుకోవాలని సూచించారు. నిర్ణీత సమయంలో సర్వే పనులను పూర్తి చేసి, రైతులకు ఎలాంటి ఇబ్బందులు కలగకుండా చూడాలని అధికారులకు స్పష్టం చేశారు.