భారత్-అమెరికా వాణిజ్య ఒప్పందం.. రైతుల ప్రయోజనాలకు రక్షణ: పీయూష్ గోయెల్

xPress24, Delhi, October 29, భారత్-అమెరికా వాణిజ్య చర్చల వివరాలు వెలువడినప్పుడు, దేశంలోని రైతులు, ఇతర భాగస్వాముల ప్రయోజనాలకు ఎలాంటి భంగం కలగలేదనే విషయం స్పష్టమవుతుందని కేంద్ర వాణిజ్య, పరిశ్రమల శాఖ మంత్రి పీయూష్ గోయెల్ తెలిపారు. దిల్లీలో ఇన్​స్టిట్యూట్ ఫర్ స్టడీస్ ఇన్ ఇండస్ట్రియల్ డెవలప్‌మెంట్ (ISID), ఐడీఆర్‌ఏ సంయుక్తంగా నిర్వహించిన జాతీయ సదస్సులో ప్రసంగించారు. వాణిజ్యం అనేది కేవలం అంకెల ఆధారంగా కాకుండా, పరస్పర ప్రయోజనాలు, పోటీ తత్వం ప్రాతిపదికన సాగుతుందని వివరించారు. సమగ్ర భాగస్వామ్య ఒప్పందాలు భారత్ కుదుర్చుకుంటున్న వాణిజ్య ఒప్పందాలు కేవలం సుంకాల తగ్గింపు, నిబంధనల సడలింపులకే పరిమితం కావని పీయూష్ గోయెల్ స్పష్టం చేశారు. దేశ ఎగుమతి అవకాశాలను పెంచడంతో పాటు సున్నితమైన రంగాలను పరిరక్షించడం, అభివృద్ధికి అవసరమైన సాంకేతికత, జీపీయూలు, వైద్య పరికరాలు పొందేందుకు ఇవి దోహదపడతాయని పేర్కొన్నారు. సేవలు, పెట్టుబడులు, విద్య, నైపుణ్యాభివృద్ధి, వాతావరణ లక్ష్యాలు కూడా ఈ ఒప్పందాల్లో భాగమని వెల్లడించారు. ఉత్పత్తుల ఎగుమతి, తయారీ రంగ విస్తరణ గతంలో మనతో పోటీపడే దేశాలతో ఒప్పందాలు జరగగా, ప్రస్తుతం పరస్పరం లబ్ధి చేకూర్చే అభివృద్ధి చెందిన 38 దేశాలతో ఒప్పందాలు ఉన్నాయని మంత్రి తెలిపారు. 2014 కంటే ముందు 10 ట్రిలియన్ డాలర్ల జీడీపీ ఉన్న దేశాలతో ఒప్పందాలు ఉండగా, ప్రస్తుతం 60 ట్రిలియన్ డాలర్ల జీడీపీ గల ఆర్థిక వ్యవస్థలతో భాగస్వామ్యం ఏర్పడిందన్నారు. నాణ్యత, ప్రపంచ మార్కెట్ పరిధిని విస్తరించడం ద్వారా భారత్ తయారీ రంగంలో గ్లోబల్ హబ్‌గా మారి 'వికసిత్ భారత్ 2047' లక్ష్యాన్ని సాధించాలని పిలుపునిచ్చారు.