మాదాపూర్ సున్నం చెరువు నుంచి నీటి తరలింపు వ్యవస్థలపై హైడ్రా చర్యలు

xPress24, Hyderabad, October 24, హైదరాబాద్ మాదాపూర్‌లోని సున్నం చెరువు పరిధిలో అక్రమంగా సాగుతున్న నీటి దందాపై 'హైడ్రా' అధికారులు ఉక్కుపాదం మోపారు. బస్తీ ఇళ్లలో గుట్టుచప్పుడు కాకుండా అక్రమంగా బోర్లు వేసి, భారీ పైప్‌లైన్ నెట్‌వర్క్‌ను ఏర్పాటు చేసిన వాటర్ మాఫియాపై హైడ్రా సిబ్బంది మెరుపు దాడులు నిర్వహించారు. నిబంధనలకు విరుద్ధంగా ఏర్పాటు చేసిన అక్రమ బోర్లను, రవాణాకు ఉపయోగిస్తున్న పైప్‌లైన్ నెట్‌వర్క్‌ను అధికారులు పూర్తిగా ధ్వంసం చేశారు. సున్నం చెరువు ప్రాంతంలో అత్యంత ప్రమాదకర భార లోహాలు (Heavy Metals) ఉన్న నీటిని తోడి.. ట్యాంకర్ల ద్వారా విక్రయిస్తూ ప్రజల ఆరోగ్యాలతో వాటర్ మాఫియా చెలగాటమాడుతున్నట్లు అధికారులు గుర్తించారు. స్థానికంగా నెట్‌వర్క్‌ను విస్తరించి వాణిజ్య అవసరాలకు ఈ కలుషిత నీటిని సరఫరా చేస్తున్నట్లు తేలడంతో అధికారులు తక్షణ చర్యలు చేపట్టారు. భవిష్యత్తులో కూడా ఇలాంటి అక్రమ నీటి దందాలకు పాల్పడితే కఠిన చర్యలు తప్పవని హైడ్రా అధికారులు హెచ్చరించారు.