మాదాపూర్‌లో సరికొత్తగా తమ్మిడికుంట చెరువును ఇవాళ ప్రారంభించనున్న ముఖ్యమంత్రి రేవంత్ రెడ్డి

xPress24, Hyderabad, November 11, ఆక్రమణల చెర నుంచి విముక్తి పొందిన మాదాపూర్‌లోని తమ్మిడికుంట చెరువు సరికొత్త పర్యాటక కేంద్రంగా రూపుదిద్దుకుంది. హైడ్రా ప్రత్యేక చొరవతో ఆధునీకరించిన ఈ సరస్సును ఇవాళ సాయంత్రం ముఖ్యమంత్రి రేవంత్ రెడ్డి ప్రారంభించనున్నారు. సుమారు రూ. 20 కోట్ల వ్యయంతో చేపట్టిన ఈ పునరుద్ధరణ పనుల్లో భాగంగా 30 వేల ట్రక్కుల పూడికను తొలగించి, చెరువు విస్తీర్ణాన్ని 29 ఎకరాలకు పెంచారు. చెరువు చుట్టూ 1.6 కిలోమీటర్ల మేర వాకింగ్ ట్రాక్, ఓపెన్ జిమ్, రోజ్ గార్డెన్, యోగా వేదికలను ప్రజల కోసం అందుబాటులోకి తెచ్చారు. బాధితులకు ఇందిరమ్మ ఇళ్లు.. అతిథిగా నటుడు నాగార్జున ఈ ప్రారంభోత్సవ వేదికపై నుంచే రామంతాపూర్ పెద్ద చెరువు పరిధిలోని 34 నిర్వాసిత పేద కుటుంబాలకు సీఎం రేవంత్ రెడ్డి ఇందిరమ్మ ఇళ్ల పట్టాలను అందజేయనున్నారు. ఈ కార్యక్రమానికి సినీనటుడు అక్కినేని నాగార్జున గౌరవ అతిథిగా హాజరుకానున్నారు. రాష్ట్ర మంత్రులు, ప్రజాప్రతినిధులు, ఉన్నతాధికారులు పెద్ద సంఖ్యలో పాల్గొని పునరుద్ధరించిన చెరువు పరిసరాలను పరిశీలించనున్నారు.