ములుగు జిల్లాలో ప్రారంభమైన 'ఖేత్ బచావో అభియాన్' సదస్సులు

xPress24, Mulugu, October 22, ఎల్‌ నినో ప్రభావంతో నెలకొన్న వర్షాభావ పరిస్థితుల నేపథ్యంలో పంటల సాగు, నేల ఆరోగ్యం, ఎరువుల వినియోగంపై రైతులను చైతన్య పరిచేందుకు కేంద్ర ప్రభుత్వం 'ఖేత్ బచావో అభియాన్' కార్యక్రమాన్ని చేపట్టింది. ఈ కార్యక్రమాన్ని ఈ రోజు నుంచి నవంబర్ 30 వరకు నిర్వహించనున్నట్లు ములుగు జిల్లా వ్యవసాయ శాఖ అధికారి వి.సురేష్ వెల్లడించారు. రాష్ట్ర వ్యవసాయ శాఖ మంత్రి తుమ్మల నాగేశ్వరరావు నిర్వహించిన వీడియో కాన్ఫరెన్స్‌లో పాల్గొన్న అనంతరం ఆయన ఈ వివరాలను తెలిపారు. ఆరుతడి పంటల సాగుపై అవగాహన జిల్లా వ్యాప్తంగా ఎల్ నినో పరిస్థితులపై వ్యవసాయ, ఉద్యానవన శాఖ అధికారులు, శాస్త్రవేత్తలతో ప్రత్యేక సదస్సులు నిర్వహించనున్నట్లు అధికారులు తెలిపారు. రబీ సీజన్‌లో వరి సాగుకు బదులుగా నీటి అవసరం తక్కువగా ఉండే ఆరుతడి పంటలను పండించేలా రైతుల్లో అవగాహన కల్పించనున్నారు. భూసార పరీక్షల ఆధారిత సూక్ష్మ పోషకాల నిర్వహణ, ఎరువుల సమతుల్య వినియోగం, ప్రకృతి సేద్యం విధానాలపై రైతులకు స్పష్టమైన మార్గదర్శకత్వం అందించనున్నారు. నీటి సంరక్షణ, నూనెగింజల సాగు ఎల్‌ నినో ప్రభావంతో వర్షాలు తగ్గి భూగర్భ జలాలు పడిపోతున్నందున నీటి సంరక్షణ చర్యలకు ప్రాధాన్యం ఇస్తున్నట్లు తెలిపారు. పొలాల్లో నూనెగింజలు, పప్పుధాన్యాలు, కూరగాయల సాగు విధానాలను పెంచేందుకు రైతులకు శిక్షణ ఇవ్వనున్నట్లు వివరించారు. రైతులందరూ అధికారుల సూచనలను పాటించి ప్రయోజనం పొందాలని సూచించారు.