మౌలానా అబుల్ కలాం ఆజాద్ జయంతి సందర్భంగా జాతీయ విద్యా దినోత్సవం

xPress24, Paderu, November 11, పాడేరు, నవంబర్ 11: భారతదేశ తొలి విద్యాశాఖ మంత్రి, స్వాతంత్ర్య సమరయోధుడు, ప్రముఖ విద్యావేత్త, భారతరత్న మౌలానా అబుల్ కలాం ఆజాద్ 138వ జయంతిని పురస్కరించుకుని బుధవారం అల్లూరి సీతారామరాజు జిల్లా కలెక్టరేట్‌లో జాతీయ విద్యా దినోత్సవం, మైనారిటీ సంక్షేమ దినోత్సవాన్ని నిర్వహించారు. ఈ సందర్భంగా జిల్లా కలెక్టర్ టి. నిశాంతి, ఐటీడీఏ ప్రాజెక్టు అధికారి ఆదిత్య వర్మ, సబ్ కలెక్టర్ కె. చిరంజీవి నాగ వెంకట సాహిత్‌లు మౌలానా అబుల్ కలాం ఆజాద్ చిత్రపటానికి పూలమాలలు వేసి ఘనంగా నివాళులర్పించారు. ఈ సందర్భంగా మౌలానా అబుల్ కలాం ఆజాద్ దేశానికి అందించిన సేవలను స్మరించుకున్నారు. స్వాతంత్ర్య సమరయోధుడిగా, గొప్ప విద్యావేత్తగా, రచయితగా ఆయన జాతీయ సమైక్యత, లౌకికవాదానికి ప్రతీకగా నిలిచారని పేర్కొన్నారు. స్వాతంత్ర్యం అనంతరం భారత విద్యావ్యవస్థ రూపకల్పనలో కీలక పాత్ర పోషించడంతో పాటు, ఉన్నత విద్యాసంస్థల స్థాపనకు విశేష కృషి చేశారని కొనియాడారు. విద్య ప్రతి ఒక్కరికీ సమానంగా అందుబాటులో ఉండాలని, విద్యా ప్రమాణాలను మెరుగుపరచాలని, పరస్పర అవగాహనతో జాతీయ సమైక్యతను మరింత బలోపేతం చేయాలన్న ఆయన ఆశయాలను ప్రతి ఒక్కరూ ఆదర్శంగా తీసుకోవాలని సూచించారు.