రైతును రారాజు చేయడమే కేంద్ర ప్రభుత్వ సంకల్పం: బండి సంజయ్

xPress24, Hyderabad, October 30, రైతును రారాజు చేయడమే ప్రధానమంత్రి నరేంద్ర మోదీ నేతృత్వంలోని కేంద్ర ప్రభుత్వ ప్రధాన సంకల్పమని కేంద్ర హోంశాఖ సహాయ మంత్రి బండి సంజయ్ తెలిపారు. హైదరాబాద్ రాజేంద్రనగర్‌లోని భారత వరి పరిశోధన సంస్థలో నిర్వహించిన 'పీఎం కిసాన్ సమ్మాన్ నిధి' నిధుల విడుదల కార్యక్రమంలో ఆయన పాల్గొన్నారు. ఈ సందర్భంగా మాట్లాడుతూ.. దేశానికి జై జవాన్, జై కిసాన్ రెండు కళ్ల వంటివారని, సైనికులు, రైతుల సంక్షేమం కోసం కేంద్రం నిరంతరం శ్రమిస్తోందని పేర్కొన్నారు. 2014తో పోలిస్తే వ్యవసాయ బడ్జెట్‌ను 5 రెట్లు పెంచిన ఘనత కేంద్ర ప్రభుత్వానికే దక్కుతుందన్నారు. పీఎం కిసాన్ ద్వారా ఇప్పటివరకు 23 విడతల్లో దేశవ్యాప్తంగా రైతుల ఖాతాల్లో రూ.4,39,000 కోట్లను నేరుగా జమ చేశామని, తెలంగాణలో దాదాపు 30,00,000 మందికి పైగా రైతులకు లబ్ధి చేకూరిందని వెల్లడించారు. కరువు మండలాల లెక్కింపుపై డిమాండ్ ఎల్ నినో ప్రభావంతో తెలంగాణలో రూ.20,000 కోట్ల నష్టం జరిగిందని బండి సంజయ్ పేర్కొన్నారు. బాధిత రైతులను ఆదుకునేందుకు కరువు మండలాల జాబితాలో మరిన్ని ప్రాంతాలను చేర్చాలని డిమాండ్ చేశారు. కష్టాల్లో ఉన్న రైతాంగానికి ప్రభుత్వం తోడ్పాటు అందించాలని కోరారు. ఎగుమతుల్లో భారతదేశం అగ్రస్థానం గత కాంగ్రెస్ పాలనలో ఆహార ధాన్యాల కోసం ఇతర దేశాలపై ఆధారపడే పరిస్థితి ఉండేదని, నేడు మోదీ విధానాలు, శాస్త్రవేత్తల పరిశోధనలతో ప్రపంచంలోనే వరి ఎగుమతుల్లో భారతదేశం అగ్రస్థానంలో నిలిచిందని కొనియాడారు. హైదరాబాద్ కేవలం ఐటీ రంగానికే కాకుండా ఐకార్ పరిశోధనలతో అంతర్జాతీయ ఐకాన్‌గా మారిందని అభిప్రాయపడ్డారు. బైట్ - బండి సంజయ్, కేంద్ర హోంశాఖ సహాయమంత్రి