విజయనగరం జిల్లాలో 4 లక్షల మెట్రిక్ టన్నుల ధాన్యం సేకరణ లక్ష్యం

xPress24, Vizianagaram, November 10, విజయనగరం, నవంబర్ 10: జిల్లాలో ఖరీఫ్ ధాన్యం సేకరణ ప్రక్రియను సమర్థవంతంగా, పారదర్శకంగా నిర్వహించేందుకు అధికారులు, సిబ్బంది ముందస్తు ఏర్పాట్లు పూర్తి చేయాలని జిల్లా పౌరసరఫరాల సంస్థ మేనేజర్ బి. శాంతి, జిల్లా వ్యవసాయ శాఖ జాయింట్ డైరెక్టర్ రామారావు సూచించారు. ధాన్యం సేకరణకు సంబంధించి కలెక్టరేట్ ఆడిటోరియంలో నిర్వహించిన జిల్లా స్థాయి శిక్షణ కార్యక్రమం రెండో సెషన్‌లో వారు మాట్లాడారు. రైతులకు ఎలాంటి ఇబ్బందులు కలగకుండా, ప్రభుత్వ నిబంధనలకు అనుగుణంగా ధాన్యం కొనుగోలు చేపట్టాలని శిక్షకులకు దిశానిర్దేశం చేశారు. గత ఏడాది జిల్లాలో సుమారు 4.16 లక్షల మెట్రిక్ టన్నుల ధాన్యాన్ని సేకరించినట్లు తెలిపారు. ఈ ఏడాది వ్యవసాయ శాఖ అంచనాల ప్రకారం సుమారు 6 లక్షల మెట్రిక్ టన్నుల ధాన్యం దిగుబడి వచ్చే అవకాశం ఉందన్నారు. ఇందులో సుమారు 4 లక్షల మెట్రిక్ టన్నుల ధాన్యాన్ని ప్రభుత్వ కొనుగోలు కేంద్రాల ద్వారా సేకరించాల్సి ఉంటుందని పేర్కొన్నారు. రైతులకు సకాలంలో సేవలందించేలా అధికారులు, సిబ్బంది సమన్వయంతో పనిచేయాలని సూచించారు.