విజయవాడలో ట్రాఫిక్ మళ్లింపు

xPress24, Vijayawada, October 20, విజయవాడలో దసరా శరన్నవరాత్రులు 2026 ముగింపు ఉత్సవాలలో భాగంగా  ఈ సాయంత్రం "మెగా కార్నివాల్"  కార్యక్రమం నిర్వహించనున్నారు. నగరంలోని SRR కాలేజీ నుంచి చుట్టుగుంట సిగ్నల్ జంక్షన్ మీదుగా విశాలాంధ్ర రోడ్డులో ఇందిరాగాంధీ మున్సిపల్ స్టేడియం వరకు జరిగే ఈ కార్యక్రమం నేపథ్యంలో నగరంలో ట్రాఫిక్ మళ్లింపులు చేపట్టినట్లు అధికారులు తెలిపారు. మధ్యాహ్నం 2 గంటల నుంచి రామవరప్పాడు రింగ్ నుంచి ఏలూరు రోడ్డులో వచ్చే ఆర్టీసీ బస్సులతో పాటు ఇతర వాహనాలను  పడవలరేవు జంక్షన్ , బీఆర్టీఎస్ రోడ్డు, సీతన్నపేట గేటు లెఫ్ట్ టర్న్, ఏలూరు లాకులు, నారాయణ స్వామి హోటల్, పాత కేశినేని ట్రావెల్స్, స్వర్ణ ప్యాలెస్ రైట్ టర్న్, పీసీఆర్ జంక్షన్ మీదుగా పండిట్ నెహ్రూ బస్టాండ్ కు మళ్లించినట్లు తెలిపారు. అలాగే బస్టాండ్ నుంచి ఏలూరు రోడ్డులోకి వెళ్లే వారు ఇదే మార్గాన్ని ఉపయోగించాలని  లేదా బస్టాండ్ నుంచి పీసీఆర్ జంక్షన్, ఆర్టీసీ వై జంక్షన్, బందరు రోడ్డు, బెంజిసర్కిల్, మహానాడు రోడ్డు మీదుగా రామవరప్పాడు వైపునకు వెళ్లాలని సూచించారు.