విద్యుత్ కొరత, ఖానామెట్‌లో అక్రమ నిర్మాణాలపై కాంగ్రెస్ ప్రభుత్వంపై విమర్శలు గుప్పించిన టిఆర్ఎస్ అధ్యక్షురాలు కవిత

xPress24, Hyderabad, November 5, హైదరాబాద్‌లోని ఖానామెట్, అయ్యప్ప సొసైటీ పరిధిలో గురుకుల ట్రస్ట్ బోర్డుకు కేటాయించిన 150 ఎకరాల భూముల్లో పెద్ద ఎత్తున నిబంధనల ఉల్లంఘనలు జరుగుతున్నాయని కవిత ఆరోపించారు. కాంగ్రెస్ ప్రభుత్వం అధికారంలోకి వచ్చిన తర్వాత ఖానామెట్‌లో ఏకంగా 500 నుండి 700 వరకు అక్రమ భవనాలు వెలిశాయని, వీటి వెనుక ప్రభుత్వ పెద్దల హస్తం ఉందని విమర్శించారు. గురుకుల భూముల్లో జరిగిన ఆక్రమణలు, అక్రమ నిర్మాణాలపై ప్రభుత్వం నెలరోజుల వ్యవధిలో కఠిన చర్యలు తీసుకోవాలని ఆమె స్పష్టం చేశారు. అయ్యప్ప సొసైటీలోని అక్రమ నిర్మాణాలపై గూగుల్ మ్యాప్‌తో సహా వార్తలు కవర్ చేయడానికి వెళ్లిన మీడియా ప్రతినిధులను ఇంటి యజమానులు బెదిరిస్తున్నారని కవిత తెలిపారు. మా వెనుక ప్రభుత్వం ఉంది అంటూ మీడియాను సైతం భయపెడుతున్నారని, కాంగ్రెస్ నడుపుతున్నది ప్రభుత్వమా? లేక రౌడీ రాజ్యమా? అని ప్రశ్నించారు. ముఖ్యమంత్రి సోదరులే దగ్గరుండి ఇటువంటి అక్రమ పర్మిషన్లు ఇప్పిస్తున్నారని ఆరోపించారు. మంథనిలో నిరుపేదల ఇళ్లను అర్థరాత్రి కూల్చివేసిన ప్రభుత్వం, హైదరాబాద్‌లో ఇంత పెద్దఎత్తున జరుగుతున్న అక్రమ నిర్మాణాలను ఎందుకు ఆపడం లేదని నిలదీశారు. అయ్యప్ప సొసైటీ అంశంపై ఆర్టీఐ ద్వారా సమాచారం ఇవ్వాలని డిమాండ్ చేసిన కవిత... రాష్ట్రంలో ఆర్టీఐ వ్యవస్థ ఒక జోక్‌గా మారిందని విమర్శించారు. ప్రభుత్వం తక్షణమే ఖానామెట్‌లో సమగ్ర సర్వే నిర్వహించి, అనుమతులు లేని, ఫైర్ సేఫ్టీ లేని భవనాలపై కఠిన చర్యలు తీసుకోవాలని కోరారు. అమిత్ షా రాష్ట్ర పర్యటనపై కవిత స్పందిస్తూ... రాష్ట్రంలో 320 మండలాల్లో కరువు పరిస్థితులు ఉంటే ఆయన కేంద్రం తరఫున సాయం చేయడం మానేసి కేవలం రాజకీయం మాట్లాడి వెళ్లారని ఎద్దేవా చేశారు. రాష్ట్రానికి ఒక్క రూపాయి కూడా ఇవ్వకుండా జీహెచ్ఎంసీ ఎన్నికల్లో పోటీ చేస్తామనడం హాస్యాస్పదంగా ఉందన్నారు. అలాగే రాష్ట్రంలో గోదావరి, కృష్ణా నీటి లభ్యతపై ముఖ్యమంత్రి ఒక మాట, మంత్రి తుమ్మల మరో మాట చెబుతూ రైతులను అయోమయానికి గురిచేస్తున్నారని మండిపడ్డారు. విద్యుత్ కొరత సమస్యను వెంటనే పరిష్కరించాలని డిమాండ్ చేసిన ఆమె, గ్రాడ్యుయేట్ ఎన్నికల్లో మహిళలు పెద్దఎత్తున భాగస్వాములు కావాలని పిలుపునిచ్చారు.