విశాఖలో రేపటి నుంచి 31వ సీఐఐ భాగస్వామ్య సదస్సు

xPress24, Visakhapatanam, November 11, విశాఖపట్నం వేదికగా 31వ సీఐఐ భాగస్వామ్య సదస్సు రేపటి నుంచి ప్రారంభం కానుంది. రెండు రోజుల పాటు జరగనున్న ఈ అంతర్జాతీయ పెట్టుబడుల సదస్సుకు రాష్ట్ర ప్రభుత్వం అన్ని ఏర్పాట్లు పూర్తి చేసింది. ‘నేవిగేటింగ్ న్యూ వరల్డ్ ఆర్డర్ – ట్రేడ్, టెక్నాలజీ, ట్రస్ట్’ అనే ప్రధాన ఇతివృత్తంతో ఈ సదస్సును నిర్వహించనున్నారు. సదస్సు ప్రారంభ కార్యక్రమానికి కేంద్ర హోంమంత్రి అమిత్ షా, కేంద్ర వాణిజ్య, పరిశ్రమల శాఖ మంత్రి పీయూష్ గోయల్‌తో పాటు ముఖ్యమంత్రి నారా చంద్రబాబు నాయుడు, ఉప ముఖ్యమంత్రి కె. పవన్ కల్యాణ్ ముఖ్య అతిథులుగా హాజరుకానున్నారు. ఈ నెల 13వ తేదీన భారత ఉపరాష్ట్రపతి సి.పి. రాధాకృష్ణన్ చేతుల మీదుగా సదస్సు ముగింపు కార్యక్రమం జరగనుంది. ఈ సదస్సులో వాణిజ్యం, పెట్టుబడులు, అంతర్జాతీయ సహకారం, వ్యవసాయం, ఆహార భద్రత, నైపుణ్యాభివృద్ధి, సాంకేతిక ఆవిష్కరణలు, స్వచ్ఛ ఇంధనం తదితర కీలక అంశాలపై చర్చలు జరగనున్నాయి. అంతర్జాతీయ స్థాయిలో పెట్టుబడులు, వాణిజ్య అవకాశాలు, వివిధ రంగాల్లో సహకారంపై ప్రతినిధులు తమ అభిప్రాయాలను పంచుకోనున్నారు.