శీతాకాలం దృష్ట్యా కేదార్‌నాథ్ ఆలయ ద్వారాలు మూసివేత.. 19.20 లక్షల మంది భక్తుల దర్శనం

xPress24, kedharanath, November 11, హిమాలయాల్లో కొలువైన ప్రముఖ శైవక్షేత్రం కేదార్‌నాథ్ ధామ్ ఆలయ ద్వారాలను శీతాకాలం దృష్ట్యా  ఇవాళ ఉదయం 8:30 గంటలకు శాస్త్రోక్తంగా మూసివేశారు. వేద మంత్రోచ్ఛారణలు, సైనిక బ్యాండ్ మంగళవాయిద్యాలు, సంప్రదాయ పూజాదికాల నడుమ ఈ మూసివేత క్రతువు పూర్తయిందని బద్రీనాథ్-కేదార్‌నాథ్ ఆలయ కమిటీ అధ్యక్షుడు హేమంత్ ద్వివేది తెలిపారు. తెల్లవారుజామున 4 గంటలకే ప్రారంభమైన ఈ పూజలను తిలకించేందుకు, బాబా కేదార్‌నాథుడిని చివరిసారి దర్శించుకునేందుకు పెద్ద సంఖ్యలో భక్తులు ఆలయ ప్రాంగణానికి తరలివచ్చారు. ఉఖీమఠ్‌కు పయనమైన ఉత్సవ డోలీ.. రికార్డు స్థాయిలో యాత్రికులు ఈ ఏడాది ఏప్రిల్ 22న ప్రారంభమైన తీర్థయాత్ర సీజన్‌లో దాదాపు 19.20 లక్షల మందికి పైగా భక్తులు స్వామివారిని దర్శించుకుని సరికొత్త రికార్డు నమోదు చేసినట్లు రుద్రప్రయాగ్ జిల్లా మేజిస్ట్రేట్ విశాల్ మిశ్రా వెల్లడించారు. ద్వారాల మూసివేత అనంతరం బాబా కేదార్ ఉత్సవ పల్లకి శీతాకాల విడిది కేంద్రమైన ఉఖీమఠ్‌లోని ఓంకారేశ్వర ఆలయానికి బయలుదేరింది. రాబోయే ఆరు నెలల పాటు స్వామివారికి ఉఖీమఠ్‌లోనే నిత్య పూజలు కొనసాగుతాయని నిర్వాహకులు తెలిపారు. యాత్రను విజయవంతంగా నిర్వహించేందుకు సహకరించిన తీర్థ పురోహితులు, కేదార్ సభ, ఎన్డీఆర్ఎఫ్, ఎస్డీఆర్ఎఫ్, పోలీసు యంత్రాంగానికి అధికారులు కృతజ్ఞతలు తెలిపారు. వచ్చే ఏడాది అక్షయ తృతీయ పర్వదినం సందర్భంగా ఆలయ ద్వారాలు తిరిగి తెరుచుకోనున్నాయి.