సంక్షోభ సమయాల్లో పౌరుల రక్షణకు భారత్ పెద్దపీట: పీయూష్ గోయెల్

xPress24, Delhi, October 23, వివిధ దేశాల్లో సంక్షోభ సమయంలో చిక్కుకున్న పౌరుల భద్రతను భారత్ ఎప్పుడూ కాపాడుతూ వస్తోందని కేంద్ర వాణిజ్య, పరిశ్రమల శాఖ మంత్రి పీయూష్ గోయెల్ తెలిపారు. జర్మనీలోని బెర్లిన్ నగరంలో జరిగిన ఒక కార్యక్రమంలో ఆయన ప్రసంగించారు. చాలా దేశాలు అత్యవసర సమయాల్లో కేవలం ట్రావెల్ అడ్వైజరీలు జారీ చేసి చేతులు దులుపుకుంటాయని, కానీ భారత్ మాత్రం పౌరులను సురక్షితంగా వెనక్కి రప్పించేందుకు ప్రత్యక్ష చర్యలు తీసుకుంటుందని పేర్కొన్నారు. భారతీయులతో పాటు ఇతర దేశాల పౌరులను కూడా రక్షించడంలో భారత్ సాయం అందించిందని వెల్లడించారు. ఉక్రెయిన్ యుద్ధ సమయంలో ప్రత్యేక పర్యవేక్షణ ఉక్రెయిన్ యుద్ధ సమయంలో చేపట్టిన తరలింపు ప్రక్రియను ప్రధానమంత్రి నరేంద్ర మోదీ స్వయంగా పర్యవేక్షించారని గోయెల్ గుర్తుచేశారు. దిల్లీలో ప్రత్యేక బృందాన్ని ఏర్పాటు చేసి నిరంతరం సమన్వయం అందించామని తెలిపారు. పొరుగు దేశాలకు నలుగురు సీనియర్ మంత్రులను పంపి తరలింపు ప్రక్రియను విజయవంతం చేశామని చెప్పారు. క్లిష్ట పరిస్థితుల్లో పౌరులను రక్షించడానికి దేశం ఎంతటి కట్టుబడి ఉందో ఈ చర్యలు నిరూపిస్తున్నాయని పేర్కొన్నారు.