సాగునీటి ప్రాజెక్టులను రెండున్నరేళ్లలో పూర్తి చేయాలి: సీఎం చంద్రబాబు

xPress24, Amaravati, November 11, అమరావతి, నవంబర్ 11: రాష్ట్రంలో సాగునీటి ప్రాజెక్టులు, ఎత్తిపోతల పథకాల పురోగతిపై ముఖ్యమంత్రి నారా చంద్రబాబు నాయుడు బుధవారం సమీక్ష నిర్వహించారు. ఉండవల్లిలోని క్యాంపు కార్యాలయంలో జరిగిన ఈ సమావేశంలో జలవనరుల శాఖ మంత్రి నిమ్మల రామానాయుడు, ఆ శాఖ ఉన్నతాధికారులు పాల్గొన్నారు. ఎత్తిపోతల పథకాల మరమ్మతులు, నిర్వహణతో పాటు సాగునీటి ప్రాజెక్టులకు సంబంధించిన భూముల్లో సౌర విద్యుత్ ప్లాంట్ల ఏర్పాటుపై సమావేశంలో ప్రధానంగా చర్చించారు. రాష్ట్రంలోని ఎత్తిపోతల పథకాల పర్యవేక్షణ బాధ్యతలను జలహారతి కార్పొరేషన్‌కు అప్పగించాలని ముఖ్యమంత్రి అధికారులను ఆదేశించారు. విద్యుత్ నియంత్రణ మండలి తరహాలో వాటర్ రెగ్యులేటరీ కమిషన్ ఏర్పాటు చేసే అంశంపై అధ్యయనం చేయాలని సూచించారు. అలాగే, రాబోయే రెండున్నరేళ్లలో ప్రభుత్వం లక్ష్యంగా నిర్దేశించుకున్న 36 సాగునీటి ప్రాజెక్టులను తప్పనిసరిగా పూర్తి చేయాలని అధికారులకు స్పష్టమైన ఆదేశాలు జారీ చేశారు.