సింగపూర్ మంత్రి గాన్ సియోవ్ హువాంగ్ విజయవాడకు రాక

xPress24, Gannavaram, November 11, విజయవాడ: 3వ సింగపూర్‌–ఆంధ్రప్రదేశ్‌ జాయింట్‌ ఇంప్లిమెంటేషన్‌ స్టీరింగ్‌ కమిటీ సమావేశంలో పాల్గొనేందుకు సింగపూర్‌ మంత్రి గాన్‌ సియోవ్‌ హువాంగ్‌ బుధవారం ఉదయం విజయవాడ అంతర్జాతీయ విమానాశ్రయానికి చేరుకున్నారు. అనంతరం ఆమె విజయవాడకు బయలుదేరి వెళ్లారు. అమరావతి రాజధాని అభివృద్ధితో పాటు రాష్ట్రంలో చేపట్టనున్న ఇతర కీలక ప్రాజెక్టుల అమలుకు సంబంధించి ఆంధ్రప్రదేశ్‌, సింగపూర్‌ ప్రభుత్వాల మధ్య కుదిరిన ఒప్పందాల పురోగతిని సమీక్షించేందుకు ఈ ప్రత్యేక కమిటీ సమావేశం నిర్వహించనున్నారు. ఈ సందర్భంగా సింగపూర్‌ మంత్రి నేతృత్వంలోని బృందం ముఖ్యమంత్రి నారా చంద్రబాబు నాయుడుతో భేటీ కానుంది. సీఎం క్యాంపు కార్యాలయంలో సమావేశం అనంతరం మంత్రి నారా లోకేశ్‌తో కలిసి సింగపూర్‌ బృందం సీఆర్‌డీఏ కార్యాలయానికి వెళ్లనుంది. అక్కడ సమావేశం ముగిసిన అనంతరం మంత్రి లోకేశ్‌, సింగపూర్‌ ప్రతినిధి బృందం రాజధాని అమరావతిలో పర్యటించనున్నారు. ఈ పర్యటనలో భాగంగా రాజధానిలో నిర్మాణంలో ఉన్న పలు కీలక ప్రాజెక్టులను వారు పరిశీలించనున్నారు.