స్థానిక సంస్థల ఎన్నికల సమన్వయ కమిటీల సమీక్ష సమావేశం

xPress24, Mangalagiri, October 26, మంగళగిరి: జనసేన పార్టీ అధినేత, రాష్ట్ర ఉప ముఖ్యమంత్రి పవన్ కళ్యాణ్ ఆదేశాల మేరకు స్థానిక సంస్థల ఎన్నికల సమన్వయ కమిటీల సమీక్ష సమావేశం నిర్వహించారు. గుంటూరు జిల్లా మంగళగిరిలోని జనసేన పార్టీ కేంద్ర కార్యాలయంలో జరిగిన ఈ సమావేశంలో రాష్ట్రంలో నామినేషన్ల ప్రక్రియ జరిగిన తీరు, పార్టీ పోటీ చేస్తున్న ప్రాంతాల్లోని పరిస్థితులపై సమీక్షించారు. స్థానిక సంస్థల ఎన్నికల్లో అనుసరించాల్సిన వ్యూహం, పవన్ కళ్యాణ్ సూచించిన అంశాలను పార్టీ రాజకీయ వ్యవహారాల కమిటీ (పీఏసీ) చైర్మన్, రాష్ట్ర పౌర సరఫరాల శాఖ మంత్రి నాదెండ్ల మనోహర్ కమిటీ సభ్యులకు వివరించారు. ఎన్నికల్లో సమన్వయంతో పనిచేయడం, పోటీ చేస్తున్న ప్రాంతాల్లో పరిస్థితులకు అనుగుణంగా వ్యూహాలను అమలు చేయడంపై చర్చించారు. ఈ సమావేశంలో రాష్ట్ర పర్యాటక శాఖ మంత్రి కందుల దుర్గేష్, జనసేన పార్టీ ప్రధాన కార్యదర్శి రామ్ తాళ్లూరి, కాకినాడ ఎంపీ తంగెళ్ల ఉదయ్ శ్రీనివాస్‌తో పాటు పలువురు పార్టీ ఎమ్మెల్యేలు, సమన్వయ కమిటీ సభ్యులు పాల్గొన్నారు.